“Mizo National Front Danbul (Constitution) Bung I-na 6. Pawl thil tumte (ii)-naah chuan, ‘Mizo hnahthlakte luah chin ram rorelna pakhat hnuaia dah,’ tih a inziak a. Tin, MNF Manifesto 2018 Political no 1-ah chuan, ‘UN Declaration on the Rights of Indigeneous People Ni 13.9.2007 behchhanin, Zofa/Zo hnahthlak ram hrang hranga thendarha awmte thuneihna sang zawk nei a, rorelna pakhat hnuaia awmkhawm turin hmalak a ni ang,’ tih a inziak bawk a ni,” VL Krosshnehzova, General Secretary, MNF General Hqrs. chuan a ti.
VL Krosshnehzova chuan vawiin khan Aizawl Press Club-ah chanchinthar lakhawmtute kawmin, “MNF hi Mizo hnam tana din a ni a, a inanghahna leh a lungphum chu ‘Pathian leh kan ram tan’ tih a ni. MNF hi din a nih tirh atanga vawiin thleng hian Zofate insuihkhawm lehna atan leh rorelna pakhat hnuaia Zofate kan awm theihna tura beitu a ni a. Hei hi MNF thuken a ni a, tun sorkar term-ah pawh MNF-in hemi a ngaih pawimawhzia hi hai rual a ni lo.
“Kan hriat theuh angin tunhnaiah Myanmar, Bangladesh leh Manipura Zofate chuan harsatna hrang hrang an tawk a. Mahni in leh lo chhuahsanin an sahimna zawngin Zofate Jerusalem, Mizoramah an rawn raltlan a. Kan unau raltlante kan lo dawnsawn a, kan lo enkawl dan kan hmuhin MNF chuan thinlung takin lawmawm kan ti a. Sorkar-in dawnsawnga a tuamhlawm dan te, YMA, MZP, tlawmngai pawl hrang hrang, Kohhran leh Political Party zawng zawngin kan theihna zawn theuhah theih tawp chhuahin kan lo buaipui a. Mizoram state-in hmun danga kan unaute tana theihtawp a chhuah hi MNF chuan ropui a ti tak zet a, nationalism-in hma a sawn zel avangin MNF party a lawm tak zet a ni.
“Tunah hian Myanmar lama kan unau, Mizorama rawn raltlan hi a pui a nawiin mi 35126 an ni a, relief camp 162-ah mi 15589 awm mekin mahni laina bel leh hmun danga awm mi 19458 an awm mek bawk a ni. Bangladesh-a Chittagong Hill Tracts atanga raltlan 772 an awm mek a, Manipur atanga kan unau rawn tlanlutte hi May ni 24 thleng khan mi 7805 an awm mek bawk.
“Kum 2022 tir lam atangin Mizoram-ah Myanmar atangin kan unaute an rawn raltlan a. India sorkar chuan thawn let leh turin Mizoram sorkar instruction a rawn pe a. Chief Minister Pu Zoramthanga chuan, “Kan unaute an ni a, hetiang dinhmuna an awm laia an nunna humhim tura rawn tlanlutte hi kan hnawt kir thei lo. A theih ang angin kan lo tuamhlawm dawn,” a ti a. Theih tawp chhuahin sorkar leh mipuiin kan lo tuamhlawm ta hi MNF chuan lawmawm kan ti tak zet a ni.
“Bangladesh lama kan unaute’n nikum November thla vel atang khan harsatna an tawk tan a. An rama an him tak loh avangin Mizorama lo luh an tum khan India ramri vengtu Sipaite’n nasa takin an lo dang a. Heti chung hian Mizorama kan unaute an lo luh theihna tur kawng hi zawn a ni a. Hemi chungchangah hian Mizoram Chief Minister Pu Zoramthanga chuan, ‘Kan unaute danbeh hi rem kan ti lo. Nangni pawh in chipui Bengali ho Bangladesh atanga India-a an rawn raltlanin in lo hum tho alawm,’ tiin a tang khawng tlat a. India sipaite an khawng viau chungin kan unaute raltlan tura an lo lut tlang thei hi a lawmawm hle.
“May thla tir atangin Manipur buaina a intan veleh a. Mizoram mi tangkhangte lakchhuah kawnga Mizoram sorkar hmalakna kha chhuanawm kan ti tak zet a, sum leh pai e’ngemaw zat sen ral a ni nghe nghe a ni. Manipur-a Zofa chi peng hrang hrang buaina tawkte Mizoram sorkar-in a buaipuina pawh lawmawm kan ti tak zet a ni.
“Mizoram sorkar chuan Manipura kan unaute tan liau liau special-in buhfai quintal 1840 (as on 19.05.2023) Manipurah a thawn tawh a. Hei bakah hian Manipur atanga raltlan Mizoram hmun hrang hranga awmte ei turin buhfai quintal 2156 (as on 19.05.2023) sorkar-in a sem tawh bawk a ni.
“Tin, kan hriat theuh angin Manipur-a Mizoram mi tangkhangte thiarchhuah hna Mizoram sorkarin theihtawp chhuahin a thawk a, Chief Minister Pu Zoramthanga pawh Manipura thlawh chhoh tumin a inbuatsaih hman hial a ni.
“Mizoram sorkarin kan unau raltlante tan theihtawp a chhuah a, naupang sikul kal rualte pawh lehkha a zirtir a, HSLC leh HSSLC te pawh tha takin an pass a, distinction hial pawh an awm. Hei bakah hian nimin mai khan sorkar chuan hriattirna siamin sorkar School-ah refugee-te luh tir turin zirna lama thuneitute hriattirna a tichhuak bawk a ni. India sorkarin raltlan thawn kir tur a tih laiin nationalist sorkar chuan a tuamhlawm mai ni lovin lehkha a zirtir hial zawk a, hnam rilru pute an lawm em em a ni.
“Zofa hmun hrang hranga cheng harsatna tawkte’n an Inpui Mizoram an belh mek laia pa chan zo taka lo changtu Pu Zoramthanga Chief Minister kan nei hi MNF chuan lawmawm kan tiin kan chhuang tak zet a. Zofate’n zalenna famkim kan neih theihna tura rammu ngam, ramri humhalh tura silai hmet puak ngam, India ram chhung leh India ram pawna Zofate tawrhna mahni chunga tla ang maia hmachhawntu Pu Zoramthanga hi MNF chuan kan chhuang tak zet a ni.
“Kan unaute kuahkhawm leh chhawmdawl kawnga Mizo mipuite tanrualnaah MNF chuan thinlung takin lawmthu kan sawi tak meuh a ni,” a ti bawk.
