Tuichangral North Group YMA chuan May 24, 2023 atangin an huamchhunga khaw hrang hrang 8, High School leh Higher Secondary School awmna – Biate, Sialhawk, Tlangpui, Khawhai, Lungtan, Chalrang, Vangtlang leh Riangtleiah te Career Guidance Programme an buatsaih a. Resource Person atan C. Lalhriatpuia, Bethlehem Veng, Aizawl hman a ni a, vawiin May 26, 2023 hian zawhfel a ni.
Resource Person C. Lalhriatpuia chuan zirlaite chu mahni tuizawng, mahni chakna leh chak lohna chiang taka zir a, chumi mila subject lak tur leh hnathawh tur thlang thiam turin a fuih a. Mizoramah Vailen vawi 3-na a thleng mek tih sawiin, All India Service leh Central Service dangah Mizo kan luh tlem tak em avangin Officer lian tam zawk Vai an ni chho mek a. Mizoramah, Mizo sorkar hnuaiah ngei hnamdang Officer rualin min awp mek a ni a ti. Chuvangin, zirlai thluak tha leh taima zualte chu UPSC leh SSC hnuaia exam buatsaih hrang hranga tling thei tura inbuatsaih turin a chah a. Exam dan kalphung leh hna chi hrang hrang awmte a sawifiah bawk.
C. Lalhriatpuia chuan Service pawimawh leh sorkar hna dang thawh tumte leh thiamna sang tak mamawh hna thawh tumte tan lo chuan pawl 12 pass hnua Professional Course zir vat a tha tih sawiin, Mizoram a hnamdangin an thawh thin hna tam tak – Construction work hrang hrangte hi eizawnna tlak vek a ni a, chimral a kan awm mai loh nan Mizo thalaiten kan thawh khalh vek a ngai a ni a ti a. Management zirna lam bawh uar turte, hna hniam deuh zawk ni a ngaihte pawh hnualsuat lo turin zirlaite a fuih a. ‘Eng line-ah pawh chhawr tlak nun leh thiamna bik neih a pawimawh ber’ tih a sawi a ni.
C. Lalhriatpuia chuan zirlaite chu rilru ti khauh a, harsatna hmachhawn ngam turin a fuih a. Harsatna chhete hmachhawn avanga depression nei an tam lutuk chu a ngaimawh tih sawiin, harsatna hi paltlang tura siam a ni a, ‘Pathianin kan paltlang zawh loh tawp tur harsatna min hmachhawn tir ngai lo’ a ti. Tin, zirlai nih laia Kohhran leh khawtlanga inhmang tam lutuk lo tur leh, an zirna leh hna zawnna lamah chauh insawrbing rih turin zirlaite a fuih a. ‘Mihring hi a beidawn hma chuan hlawhchham a ni ngai lo’ tih sawiin, hlawhtlin mai loh pawha beidawng miah lo tur leh Pathian hnena innghat tlat turin zirlaite a fuih bawk a ni.
Tuichangral North Group YMA buatsaih Career Guidance Programme hian ngaihhlut a hlawh hle a. Khaw tinah zirlaite, zirtirtute leh Branch YMA hruaituten an dawngsawng tha hle a ni.
