MZP General Headquarters leh Chin Baptist Church USA Indianapolis tangkawp te chuan, Manipur buaina avanga sahimna zawng a Mizoram rawn lut Tinghmun, Sakawrdai leh Vaitin a awm te chu buhfai leh sumfai an hlan. MZP General Headquarters hruaitute hi an President Lalnunmawia Pautu chuan a ho a ni.
MZP hruaitute leh raltlan awmna hmun hrang hranga awmte chuan inkawmna hun an hmang a, he hunah hian MZP President Pu Lalnunmawia Pautu chuan, sahimna zawnga Mizoram rawn kal te chu Mizoram Kohhran hrang hrang te, NGO hrang hrang te leh Political party hrang hrang ten inlungrual tak a an lo dawnsawn thu leh an lo enkawl thu a hrilh a. Mizoram chu Zofate Jerusalem anih avangin thlamuang taka awm turin a chah bawk.
MZP President chuan, Mizoram mipuiten hmangaih taka an enkawlna chu, a tha thei ang bera chhanglet a, Mizoram a an awm chhunga khua leh tui tha tak ni turin a chah nghal a ni.
MZP General Headquarters in tanpuina a pek dan chu hetiang hi a ni.
1)Tinghmun Branch YMA-ah Buhfai bag 12 leh Rs 5,000/- leh eitur chi hrang hrang hlan a ni.
2) Sakawrdai Relief Camp-ah Buhfai bag 15 leh Rs 5,000/- leh eitur chi hrang hrang hlan a ni.
3) Vaitin VC-ah Buhfai bag 3, Rs. 2,000/- leh eitur chi hrang hrang hlan a ni.
MZP General Headquarters hruaitute hi H.S.A Sinlung Hills Joint Headquarters leh H.S.A Sakawrdai Unit ten an tawiawm a ni.
