Vawiin khan AAP Mizoram hruaitute chu Treasury Square a an Pisaah an inhmukhawm a, hmalak dan tur leh hma an lak dante an sawiho a, meeting hi AAP Mizoram President Andrew Lalremkima’n a kaihruai.
Tunhnai hian Mi Naran Pawlte hian Sawrkar Sikul hrang hrang an tlawh kual a, heng sawrkar sikulte dinhmun hi a chhe hle a. Sikul thenkhatah chuan zirlai awm mang lohnate a awm a, a thenah chuan Subject Zirtirtu awm lohna, zirtirtu ama subject nilo an lak takte a awm a ni. Hetiang a nih chuan zirlai tan thiamna a awm ngai dawn reng reng lo a ni an ti.
AAP Mizoram chuan, “Sawrkar sikul hi hmunhma nei tha leh naupang tan pawh a tuallenna hmun neitha an ni deuh vek a, amaherawhchu sikul compound leh Building-te erawh kan chenna atan pawha kan duh loh tur deuh vek a ni.
“Kan sawrkar hian a zirna sikulte hei aia chik zawk hian zirchiang se, Minister/MLA ten an tu leh fate an luh tir ngamna turin zirna in siamtha rawh se. AAP Mizoram chuan sawrkarna a chang a nih chuan zirna a ngai pawimawh hle dawn a, zirna a that phawt chuan Mizoram hian hma a sawn ngei ngei dawn a ni.
“Tunah hian district dangah Board din tum mek a ni a, corruption do hlawhtling a Mizoram hmasawnna duh tak tak tan AAP-ah hmun a awm reng a, mipuite pawh kan ram siamtha tura min support zel turin kan ngen in kan sawm bawk che u a ni,” tiin thuchhuah an siam.
