Vawiin May ni 30, 2023 Thawhlehni hian Mizo National Front, Serlui North leh South block te chuan Bilkhawthlir Village Council Hall-ah Media & Political Training neih a ni a. He hunah hian J.Malsawmzuala Vangchhawng, Adviser MNF Gen.Hqr. chuan thusawiin, “MNF chu Mizo nationalism kengtu kan ni a, kan hnam, kan ram leh kan sakhua a him zelna tura thawktu kan ni. Kan innghahna thupui chu ‘Pathian leh kan Ram tan’, tih a ni a. A chhe thei ang bera thudik ziak tluak lo leh dawt hmangtein beih kan tawk ṭhin a. Sawiselna leh deuna karah pawh kan Pathian chu kan vuan tlat a, chhe lailet dera puhna karah pawh Pathianin min hruai zel a ni,” a ti.
J.Malsawmzuala Vangchhawng chuan, Hripui, Lirnghing, Vawk pul hri, ramri buai leh chhan hrang hrang vangin zoramin hun harsa tak kan tawk a. Pathian hruaina bakah, kan CM Pu Zoramthanga ruahman thiamna te, NGO leh kohhran thawhhona avangin kan paltlang thei a. Chhuanchham awm lovin vawiin kan thleng thei a alawmawm hle. Tunah chuan hrite a lo ziaawm chho ta a, hmasawnna nasa leh zual he ram tan hian a thleng zel dawn a ni, a ti a. Gas kan hnianghnar ta em em a, buhfai lah nise kan chhekkhawl hnekhnuk a, ei leh barah harsatna kan nei ta lo te hi a lawmawm tak zet a ni, a ti bawk.
VL.Krosshnehzova General Secretary MNF Gen.Hqrs. pawhin thusawiin, “MNF Media department tihchangtlunna tur leh zau zawka ram rawngbawlna atana tangkai taka hman a nih theihna tura he media training hi neih a ni a. Kan ramah social media hrang hrang hman kan uar a, kan tangkaipui viau laiin, dâwt leh thu belhchian dawl lo a mipuite rilru hruaikawi leh hruaichhe thei zâwnga media hman sual ching, mimal leh Political Party thlengin kan awm hi a pawi a; Dik tak leh awmze nei tak si, mipui tana tangkai tur zâwnga social media hman thiam hi MNF Party chuan kan duh leh kan tum a ni.
“Tin, tunlai media khawvelah kan cheng tawh a social media in min chenchilh tawh a, chuvangin tangkai tak a hman a pawimawh hle a, Kan tu leh fa te tan social media hman that dan kan inzirtir thar leh atul hle bawk. Kan pi leh pu khawih thiamlo an awm pawhin media hman thiam dan zirtir a pawimawh hle a ni, a ti bawk. He training hian hmasawnna tha tak a neih ka ring tlat a, vawiin a kan training bàk pawh hi zoram hmun hrang hrangah tuam chhunzawm zel kan tum a ni” a ti a.
VL.Krosshnehzova chuan “Nangni leh keini hi zoram tan thawk tur kan ni a. Zoram siam tha tur leh kan rawngbawlna a ni tih hriain kan rawngbawlna te hi hma i la chhunzawm zel ang u, a ti bawk.
Media & Political Training hi Lalrinthara Vangkeu President, Serlui South Block chuan a kaihruaiin, H.Vanlalrawna Gen.Secy., Malsawmpuia Ralte Joint Secretary, Peter Chhangte Joint Secretary-te hnen atangin media technical lam ngaithlak a ni bawk. Serlui North leh South Block huamchhung atangin Member thahnem tak an kal khawm bawk a ni.
