Vawiin May ni 30, 2023 (Thawhlehni) hian NSUI Mizoram huaihawtin 2022-2023 HSLC leh HSSLC Topper-te lawmpuina hun Vanapa Hall-ah hman a ni a. MPCC President Lalsawta khuallian a ni.
MPCC President Lalsawta chuan Mizoramah hian ram danga an neih ang leh an tih dan tam tak chu kan nei ve vek a, mahse kan lo kalpui thin danah leh sorkar chakna hmanga zirlaite kan enkawl danahte pawh kawng thar (reforms) tam tak kan neih a ngai, tih sawiin, mipuiin Sorkar School aia Private School an thlang tlatte thleng hian sorkar tan chuan siam that tur a tam tih a chiang a ni. Hei hi Congress Party chuan kan ram mamawh a nih dan kan hria a, ‘Reforms’ ngai tam tak zingah kan ngaih pawimawh a ni, a ti.
Lalsawta chuan, Mizoramah hian tunhma zawng aiin kan thalaite hi khawvel ram dang thalaite nen tual khatah an cheng za ho ta leh zual a. Mi tam takin Mizoram chhung mai a thawk tura kan rilru kan lo neih thin pawh hi India ram leh khawvel huap pawha thluak inelna kawngah kan inbuatsaih a, kan intahhriam a ngai a. Kan Mizo thalaite Quality hi kan hrechiang a, tumna a awm chuan khawvel inelnaah hian a ti tha ber in ni thei tih hi kan hrechiang che u a ni. Khawvel hneh turin in rilru lo buatsaih rawh u, a ti.
Politics chu ram leh mipui tih hausakna tur a ni tih sawiin, kan ram hian tih tak zeta ram tana thawk tur a mamawh a, vawiinah hian aw rawl chhuahin ram hmangaihtute a aukhawm mek a ni. Politics hi mimal hausakna tur a ni lo a, ram leh mipui tih hausakna hmanrua a ni tih hriaten kan Party an rawn bawr khawm tan mek a, nangni pawh zirlai mai ni mah ula, Politics in ngaihtuah ang a, fim takin hun lo kal tur (future) siamtu in ni tih hriain inbuatsaih sauh sauh rawh u, a ti bawk.
Lalsawta chuan, Zirlaite tan Bank atanga Study Loan lak a harsa tih sawiin, ngaihtuahna thar hmanga sutkian a nih chuan dingchhuak thei, kan ram rohlu (Assets) te hi vawiinah harsatna hrang hrangin tlakbuak rih che u mah se, in theihna hmang tangkai turin Congress Party chuan kan Sorkar theih phawt chuan remruatna tha leh tluantling siam kan tum, tih sawiin, 2023 MLA inthlan Congress Party Manifesto No. 1 ‘Tang Puihna’ huam chhungah zirlaite’n zir zawm duh harsatna tawkte saltanna atanga in chhuah theih nan loan mamawhte tan theihtawpa hmalak theih a nih thu sawiin hengte tan hian Sorkar a ding dawn. Congress Sorkar kal ta kum 2018-19-ah pawh NEDP-a hman tur cheng vbc. 1,000 (cheng nuai hlir nuai khat) kan dah thei. Kan ram hmathlir leh Mizoram siamtu tur nangni tan hian hetiang hmalakna hi kan ti dawn tih ring ula, thlamuang takin ram tan Pathian malsawmna dawng turin rim takin lehkha zir ang che u, a ti bawk.
MPCC Vice president Lal Thanzara pawhin thusawiin, Thawhrimna leh huaisenna chu zirna kawnga hlawhtlinna a ni tih sawiin, Mathematics avanga tum thum ngawt Matric failed ka ni. Mahse Pathianin hriatna min pek te tipung turin theihtawpin ka bei a. Master degreee hial zo vin, Pathian leh mipuite duhsakna changin ram tan hna ka thawh ve theih phah a ni. Nangmahni leh kan ram tan theihtawpin lehkha zir rawh u. Chutah chuan Pathian malsawmna in hmu ang, a ti bawk.
NSUI President PB Lalmalsawma chuan, kan ram hmalam hun min chher saktu Zirtirtute leh zirlai te zahna chibai kan buk a ni tih sawiin, Aizawl khawpui leh Mizoram hmun tam takah Zirlaite’n harsatna tam tak an tawk a. Duh ang taka leh kha pawh zir hlei thei lovin an inhlawh thin. Hengte tan hian Sorkar hian hamthatna a pek a tul. Sorkar school-in hamthatna hrang hrang an dawn angte hi Private School-te tan pawh huam tel tir a tul a ni. NSUI hian Zirlaite mangang leh harsatna tawkte tanpui leh dawmkan hna nasa takin an thawk thin a. Zirlai tam takin hlawhtlinna an chan phah a ni, a ti a. Mizoramah pawh zirtirtu leh zirlaite’n harsatna in tawk a nih chuan lo kal ula. MZP, MSU te nena tangrualin hma kan la ang. State dangah phei chuan nasa takin NSUI hian kan pui thei che u a, in tan englai pawhin kan awm reng a ni, a ti bawk.
He hunah hian Nihar Kanti Chakma MLA, Rosiamngheta AMC Ward No. V Corporator, MPYCC President Laltawnliana, NESO hruaitute bakah Aizawl khawpui chhunga school pali atangin Zirtirtute leh zirlai engemawzat an kal a. Lalmuanawma NSUI Vice President-in a kaihruai a. Rev. Z. John Malsawma Colney-in hunserh hmangin Lalthanzuala Vice President & Org. Committee in report leh Introduction hun a hmang a. Jerome L Bawlte-in lawmthu a sawi bawk. He hun hi Angelina Paul-in hneh takin a kaihruai a, H. Vanlalhlana leh Sangkimi Khiangte ten zaiin mipui an awi bawk.
