30/5/2023, Lungsen: Congress Legislature Party (CLP) Leader leh Thorang Bialtu MLA ni bawk Zodintluanga Ralte chuan, zirlaite chu ‘off-screen’ hun nei tam tur leh lehkhabu chhiar tam turin a fuih.
Vawiina Lungsen North Branch YMA Hall a, MZP Sub-Headquarters; Lungsen ten kum 2022 – 2023 chhung a, HSLC pass thar te lawmpuina an buatsaih-ah fuihna thu sawiin, Zodintluanga chuan, “Ka bial chhung Lungsen khuaa zirlai tiṭha lawmpui tlak heti zat kan nei hi a lawmawmin, kan thlen china hlawhtlinna neite kan lawmpui hle bawk a ni,” a ti a.
“Tuna la hlawhtling ve lote tan hun ṭha a la inher dawn a, tun hi kan tawpna a ni lo a, bul kan ṭanna chauh a ni. Zirnaah hian a pawimawh ber chu beidawn loh leh mi puitling nih theih a ni ber a ni,” Bialtu MLA chuan a ti bawk.
Thorang Bialtu MLA chuan, “COVID-19 avangin kum 2020 chho atangin kan zirna kalpui dan nasa takin a danglam a. Loh theih lohna avangin ‘online’ lam hawiin kan kal nasat avangin; phone, laptop leh a kaihhnawih ‘screen’ lam kan bih nasa ta hle a. Naupang atanga upa lam thlengin ‘off-screen time’ kan insiam tam a ngai a ni,” a ti a.
“Screen-time’ insiama inkhuahkhirh hi a that rualin, zawm a har avangin tul leh mamawh takzetah lo chuan ‘screen’ hi kan khawih loh a ṭha ber tawh a. Naupang awmtlei nana phone pekte avanga harsatna hi a taka Mizoramah ngei kan natna hmachhawn lian tak a ni mek a ni,” a ti bawk.
Zodintluanga chuan, Kuminah pawh zirlai titha bik lehzualte pawh kan hriat angin ‘social media’ khawih tam lo, ‘screen’ hmaa hun hmang tam lo an ni a. Lehkhabu chhiar tam bawkin a ler lam zel an luah a ni, a ti a.
Zirlaite chu Lehkhabu chhiar tam tura fuih nawnin, “Engtiklai mahin lehkhabu chhiar zaute hi an inchhir ngai lo a. Biate khuate pawh kum 1992-a Di In Library an neih hmain YMA hruaituten lehkhabu thahhnem tak an inkawlchhawk thin,” tia sawiin, chu chu naupangin an hawh nasa thei hle a, Library-a lehkhabu awmte chhiar zawh vek theih an tum thin a ni, a ti a.
Biate khua hian kum 10 chuang chu zing leh tlaiah Library an hawng thin a, naupang zingah a hawh tam leh chhiar tamte lawmman an siam ziaha a lun hle a thin a ni, a ti a. Sorkar pawhin duhsakna nasa takin a vur phah mek a ni, a ti bawk.
Zodintluanga chuan, Zirlai kan nihin phone khawih loh tur tiin kan inzilh ngawt thei lo a, tihtur leh rilru dang lakpenna tur kan dap a tul ber a. Lehkhabu chhiar bakah; taksa sawizawina lam nasa takin kan uar thar a tul em em a ni tih hi kan puangzar zel a pawimawh a ni, a ti bawk.
MZP Sub-Headquarters; Lungsen te hian kum 2022-2023 chhunga Lungsen khua atanga HSLC Pass mi 21 te hnenah chawimawina thilpek an hlan a. Lungsen High School atangin mi 18-in HSLC hi pass in, midang 3 hi hmun dang atanga pass an ni.
Zirlai tithate Lawmpuina inkhawm-ah hian Lungsen BDO Obed Lalmalsawma leh MZP Sub-Headquarters; Lungsen President Lalpekhlua Punte bakah Gov’t High School Lungsen Headmaster H. Rohmingliana te pawh in thu an sawi bawk a. Lungsen khua HSLC pass thar te lawmpuina inkhawm hi MZP Sub-Headquarters; Lungsen Treasurer LH Lalramlawmi’n a kaihruai a ni.
