A intiamna anga SEDP sem turin Mizoram sawrkar phut

MPYCC chuan thuchhuah siamin, “Hun rei tak atang tawha tlumtea thlira kan thlir, Sawrkar term tawp dawn hnaih lama MNF Sawrkarin SEDP hawnna hun hmang a, SEDP sem tan a tum hi Congress thalai chuan a dawngtu turte kan lawmpui takzet a, chhungkua, ram leh hnam hmasawn nana hmang vek turin duhsakna kan hlan bawk a ni.
“Chutih rualin mipuiin MNF Party hnenah, ‘cheng nuaih 3 aia tlem lo min pe ru kan ti reng reng lova’. ‘MNF Party-in kan sorkar chuan, cheng nuaih 3 aia tlem lo kan pe vek dawn che u’, tia an intiamna zawk anih avangin, cheng nuaih 3 aia tlem lo tiam tuten, Cheng singnga (Rs. 50,000) SEDP ah sem an tum a, 1st installment a Cheng singhnih sangnga (Rs. 25000) pek an tum ta mai hian, an intiamna a an din loh zia leh Mizoram mipui min hmuhsit zia a ti lang chiang hle a ni.
“MIP Project a lokal pui tawh ang mai a, Cheng singthum pek tumin, Cheng sangsarih a sem ang vela hmasawnpui tham ni mang si lo, sum semchhuah a tum hi Congress thalai chuan tha lo kan ti hle a ni.
“Pu Lalsawta kaihhruaina hnuaiah Congress Party kan tho chhuak leh mek a, Mizoram mipuite tan Sorkar tha siam ngei turin kan in buatsaih chho mek a.
“Kan insiamthatna tur leh Sorkar tha kan siam theihna tura thurawn leh zilhna kan mamawh hle tih kan pawm a, Kohhran rawngbawltute, sorkar hnathawkte, Mizoram vei tak tak tute, Mizoram mipuite, Mizoram-a Party hrang hranga ram veitute leh sorkar tha siam duhtu zawng zawngte thurawn min pe a, min finchhuah turin kan sawm tak meuh meuh che u a ni,” an ti bawk.