Thawhtanni zan lama hmeichhe nau paw lai kutthlaktu Social Media-a nasa taka vawrhdarh chungchangah Mizoram Police chuan hma la nghalin, vawiin lam khan an man nghal a ni.
Aizawl District Police te chuan an thudawn bawhzuiin, Siaha Police te chuan hmeichhe kut thlaktu hi vawiin khan an hrechiang thei a, nau pawlai rawng taka kutthlaktu kha Lalramdinsanga (25) s/o SB Gurung (L) Siahatlah-II a ni a, Siaha Police Station ah lak nghal a ni.
Hemi chungchangah hian MHP Gen. Hqrs. chuan vawiin khan Social Media a Video thehdarh, mipa pakhat in hmeichhia pakhat kut a thlak lai darh mek chungchangah kutthlaktu mipa hi zawnchhuah ngei a nih theihnan Aizawl S.P C. Lalruaia chu a pisa-ah an hmu a, Aizawl SP chuan he video chungchang hi an bawhzui thu leh chhuizui a nih thu a lo hrilh a ni.
Lalramdinsanga hi man a nih hmain Mizoram State Commission for Women chuan MSCW Case (Suo moto) a ziak lut a. He video hmuh nuam lo tak hi social media-a tarlan zui zel a nih loh nan he video kawltu zawng zawng, sawrkar thuneitute tih loh chuan lo delete hram turin an ngen a. Kar khat hnuah he case hi ngaihtuah leh a ni ang, an ti bawk.
