Congress Legislature Party Leader leh Thorang bialtu MLA Zodintluanga Ralte chuan, Pu Zoramthanga kaihhruai MNF sorkar chu, a chhe lai siam tha tu ni lovin, a tha lai siam chhe tu a ni, a ti.
He thu hi a bial khaw hrang hrang fang mek Thorang Bialtu MLA Zodintluanga chuan vawiin khan Marpara YCA hall-ah sawiin, tun MLA term khat chhung lek hian Thorang bial chhung khaw hrang hrang a, Congress sorkar laia hma an lo lak tawh na leh hmalak zui ngai tam tak an hnutchhiah te chu MNF sorkar in ngaih thah a, an enkawl zui loh avangin, hman tlak loh a tawl ta leh chei that ngai tak tak hmuh tur tam tak a awm tawh a ni, a ti.
Zodintluanga chuan, Thorang bial chhung khua zawng zawng deuhthaw a, inkalphawhna kawng Congress sorkar in a lo laih tlang vek tawh pawh MNF sorkar hian chei that leh enkawl zui a tum loh avangin, furpui lo thleng tur lo hmachhawn pawh a huphurh awm zual hle dawn a ni, a ti a. A bial chhung khaw hrang hrang a zirna in a bikin High School leh Higher Secondary School a zirtirtu te MNF sorkar hian an duh duh sawn chhuak a, a thlak na tur an dah leh tawh loh avangin, zirlai ten an tuar em em a ni, a ti a.
Thorang bialtu MLA chuan, a bial chhung a MNF sorkar in, an sorkar chhung reilo te chhung a hma an lak ve na awm chhun, mit ngeia a hmuh te chuan a rilru a tih nat thu sawiin, sum siam na atan chauh a Thorang bial chhung hmang duh tu te hi chu kan hnawl nawn fo a ngai a ni, a ti a. MNF sorkar hian Thorang bial mai nilo, Mizoram hi a hmangaih tak tak loh zia, Zoram mipui te hian kan hmu chiang tawk tawh a ni, a ti bawk.
SEDP chungchang sawiin, Zodintluanga chuan, SEDP hi tlakran na tur kawng khat, awmze awm lo a mipui sum khawhral na mai mai a ni tiin, MNF sorkar in SEDP Rs. 25000 an sem mek hian awmzia a nei lo a, a dawngtu ten eng atana hman tur nge pawh an hre lo a, mipui te dinhmun chawikan tum na lam aiin, an party mi leh sa te sawh ngheh nan leh an party a mi thlem luh nan an hmang mek a, SEDP sum an sem mek hi mipui ten kawng hrang hrang a chhiah kan pek tlingkhawm, mipui pawisa diklo tak a MNF sorkwr in a hman na niin a sawi a, MNF sorkar hi Mizoram mipui ah an tla fel tawh a ni, a ti bawk.
ZPM chu baloon lian taka hampuar ang an nih thu sawiin, inthlan hma in a keh tan a, an hruaitu lawk ten lamtang MLA candidate tur an in zawn siak mek a, bial tin deuhthaw ah candidate tur pathum pali lai te an sawm fel a, buai chinfel tur an ngah hle a ni, a ti a. Congress party chu Mizoram hmasawn na tur a hna nasa taka lo thawk tawh thin leh hmasawn na nasa lehzual thlen thei tu awmchhun an nih thu a sawi bawk.
Thorang bialtu MLA hian nimin khan a bial chhung Bunghmun khua ah hun hmangin, vawiin khan Sesawm leh Laisawral khua bakah Marpara khua ah te hun a hmang leh a ni.
