Congress Party chuan thuchhuah siamin, “MNF President leh Mizoram Chief Minister ni bawk, Pu Zoramthanga’n Sept ni 26 a Hnam Runa a thusawinaah ‘Mipui bum tumin thu chhumbung sawi an awm thin’ a ti chu amah a insawina nge a dawt sawi thin sawi mam a tumna zawk tichiang law law turin Congress party chuan Pu Zoramthanga kan ngen a ni,” an ti.
Thuchhuahah chuan, “Pu Zoramthanga’n ‘Aizawl khawpui hi traffic jam awm lohna state Capital-ah chuan a awm chhun a ni tih turin kan siam dawn’ a tih te, ‘Mizoram hi Switzerland of the East-ah kan siam ang’, tih te, ‘kan Sorkar hunah vai buhfai kan ei tawh lovang’ tih te, ‘Kum thum chhungin ei leh barah kan intodelh thei’ tih te, ‘kan sorkar chuan chhungkaw tinte hnenah, NLUP dawng tawh zawng zawng pawh cheng nuai thum kan pe dawn’ tih te, ‘A dam lo a piangte hman turin SEDP-ah nuai 2 kan dah’, tih te hi a chhumbung chauh ni lo, a tluana mipui bumna a ni zawk,” an ti bawk
Congress party chuan, “MNF President Pu Zoramthanga’n a Chief Minister sorkar theih nana mipui a bumna zo zai te hi ngaihdam theih chi a nih loh laiin, mipui bumtuah midang a puh let ta daih mai hi hriatthiam a harsain Zoram mipuite engahmah angaih loh zia he thil hian a tarlang chiang hle a ni. Mipui a bumna hrang hrangte hi theihnghilh theih a ni lo,” tiin Mipui bum nana a thusawi thenkhat nia an sawite a hnuai a mi ang hian an tarlang :
1. January ni 17, 2019-a Union Minister Hardeep Singh Puri a hmuh tumin ‘kawng chhawng zir chiang tur study team rawn tirh a tum a, football stadium 6 siamna min pe dawn’ a ti a, vawiin thlengin a hlawhtlinna hmuh tur a awm lo.
2. January ni 24, 2019 ah Aibawk mipui hmaah Pu Zoramthanga hian ‘Citizenship Amendment Bill (CAB) hi kan duh lova, na takin kan do zel dawn, a tul a nih chuan NDA atanga inhnuhdawh pawh kan hreh lo’, ti a. Mahse, Parliament-ah CAB an thlawp leh si.
3. January ni 30, 2019 a Hoticulture Dept hnuaia Technical Officer te Aijal Club-a Meeting a neihpuinaah ‘Mizoram hi khawizu leh hnute tuiluanna ramah siam kan tum’, a ti.
4. February ni 4, 2019 a MIDH ten Meeting an neih a telpui tumin kan CM hian Mau hmanga khawvel entawn tur hnutchhiah a tum thu leh Mau hmanga India ram per capita income sang ber kan ni dawn tih a sawi.
5. April ni 3, 2019 a Serchhip a MP Campaign-naah ‘Project lian siamin Delhi sum kan hnukchhuak ruih ruih dawn’, a ti.
6. May ni 9, 2019 a Mizoram Engineering Service Association khawmpui a hmanpui tumin Pu Zoramthanga hian, “Hnam dang contractor leh supplier a tlem thei ang ber chhawr kan tum”, a ti a. Mahse, hnam dang contractor-te chu nikhat pawh Treasury a bill tang lo a bill la nghal thei an ni fur zawk.
7. May ni 29, 2019 a a bial Aizawl East-I a fan tumin a bial mipuite hnenah ‘sorkar hna thawk kher lova eizawnna ngelnghet mipuiin an neih theih nana hmalak a tum thu a sawite kha eizawnna ngelnghet chu a siam sak ta em, tih hi Congress Party chuan a zawt let a ni.
8. July ni 20, 2019 khan, “Ruihhlo ngai sim tawhte eizawnna siam sak kan tum,” a ti bawk a. Engmah hmalakna hmuh tur a la awm lo.
9. July ni 22, 2019 ah ,”Ramri buai hi a chinfel dan tur felfai tak kan nei,” tih thu a sawi a, mahse, ramri buai chinfel a la ni chuang lo.
10. July ni 25, 2019 ah Chanmari Hall-a Ex MNA General Assembly vawi 10-na a hmanpui tumin Pu Zoramthanga hian ‘SEDP a tanga kawng siamin, ram kan pe dawn che u a, eizawnna ngelnghet chhe thei tawh lo tur in neih theih nan theihtawpin kan thawk dawn a ni. Kal tate thisenin min baptist thuthlung hi i kalsan lovang u’, a ti a. Ex MNA te hi ram a la pe lo, eizawnna ngelnghet chhe thei lo a la siam sak chuang lo.
11. February ni 21, 2019 a Synod Executive Member te leh MLA te JM Lloyd Hall, Synod Office a inkawmhona an neih tumin kan CM hian Rangvamual leh hmun thenkhata zu zuarte chu sum seng zawnga tanpui lovin eizawnna siam sak a tum thu sawiin, “A aia hlawk zawk eizawnna an neih hnuah chuan tumahin zu an zuar peih tawh lovang,” tih thu a sawi a. Hmalakna erawh pakhatmah a la awm lo. Kohhran hruaitute hmaah meuh pawh mumang sawi a thulh chuang lo.
Mizoram mipuite hian party hruaitute zingah tu ber hi nge mipui hnena dawt sawi ngun ber leh dawt sawi thiam ber tih hi an hre tawh. Hetih laia mahni dawtsawi thup nana Pu Zoramthanga’n ‘thu chhum bung’ sawi thin anga midang a puh daih hi Congress party chuan hriatthiam harsa a ti hle a. Hetiang mi ram hruaitu kan nei hi a vanduaithlak rualin Congress party thawhlehna hmanrua atana MNF in President atana Pu Zoramthanga an nei hi a lawmawm kan ti hle thung si a ni.
