A vawikhat na atan Trinity Hospital ah lung zai a ni

July ni 16 2022 (Inrinni) khan Mizorama a vawikhatna atan Trinity Hospital (Silaimual)-ah heart surgery neih a ni a. Dr Rahul Chandola, Cardio-Thoracic and Vascular Surgeon (CTVS) leh a team-ten lung natna nei mipa kum 59-mi chu a awm zai hawngin, heart surgery chi khat – Coronary Artery By-pass Graft (CABG)Surgery hlawhtling takin an zai.
Dr. Chandola sawi danin he damlo hi High Risk Cardiac patient, (serious tak) niin a lung chawmtu thisen dawt engemaw zat a pin avangin thisen a kal thei lo a. Lung hna-thawh dan (heart function) chu nasa taka tla hniamin, 25% vel chauh niin a sawi. Zai hnuin a ziaawm hle nia a hmuh thu a sawi a. ICU-ah dah nghal a ni a, a dinhmun hi uluk takin Dr. Chandola Team-ten an vil reng a. Damlo hi discharged theih a nih hma chuan he Medical Team hian hawsan loin an vil zui dawn tih a sawi bawk.
Damlo hi Dr. Rahul Chandola ( CTVS), Dr. O.P.Sinha (Cardiac Surgeon), Dr. Jitendra Chauhan (Cardiac Anaesthetist), Dr. Avinash (Perfusionist), leh Delhi atanga an rawn hruai nurse team-ten darkar li chuang an khawih a, a thisen dawt ping hmun thumah bypassed a ni. Trinity Hospital Medical Team pawhin phai lam Medical Team hi an tawiawm bawk.
Trinity Hospital Director (Dr. Lalrintluanga Jahau) chuan rei tak an lo tum leh suangtuah, Mizoram ngeia lung natna zai theih a ni ta chu Pathian hruaina liau liau nia a hriat thu a sawi a. Hemi atan hian “Cardio Thoracic Lab” an din bakah heart bypass surgery atana khawl pawimawh – Heart-Lung Machine, Inter Aortic Pump leh Cardiac Anaesthesia Workstation te pawh tunhnaiah Trinity Hospital-ah hian bun thar an ni bawk. Inzaina man pawh hi phai lam aiin a tlawm zawk mai theih thu a sawi a ni.
He heart surgery atana thisen mamawh te Civil Hospital, Synod Hospital leh ZMC-a Blood Bank-ten phal taka an ngaihtuahsak avangin heng damdawi-in thuneitute leh thawktu-te chungah lawmthu a sawi a ni. July ni 17 (Sunday) pawh khan damlo dang 2 an zai leh bawk. Dr. Chandola leh a team te hi thla-tin Trinity Hospital-ah an lokal zui tawh dawn a ni.