Aam Aadmi Party, Mizoramte chuan, “Mizoram in sorkar kan hrawn tawh zawng zawng te’n vawiin thlenga tuialhthei dahkhawlna (oil depot) mumal an la siam lo hi mak kan ti a, keini ang ram kilkhawr mamawh em em ngaih pawimawh a ni lo thin hi a thinrimthlak tak zet kan ti. Tuna ZPM kaihhruai sorkar hian chhuanlam siam lova a rang lama siam vat turin na takin kan ngen nghal bawk.
“Tuialhthei a kaihlak hlek changa petrol pump zawng zawng te sorkar in a khuahkhirh nghal vat thin hi mipui chanvo rahbehna dik tak niin kan hria a,he thilah pawh hian sorkar hnuaia thuneitute in lak VIP na hi a khamawm kan ti takzet a, kalphungthar min tiamtu ZPM sorkar hian hei hi chhu chat tawh se, essential service department mamawh bak zawng zawng chu mipui tana semzai thin tawh turin kan phut tlat a ni.
“Mizoram ah The Petroleum Act,1934 leh The Petroleum Rules, 2002 kenkawh a ni lo hle in kan hria a, mipui mimir tan a tuialhthei lei tur a awm loh laia man to zawk a lei tur a awm reng si hi mak kan ti hle bawk.
“Tin,tun hnu ah a chunga kan sawi anga mipui mimir tan petrol/diesel an semzai thei dawn lo a nih rau rau chuan mipui te banphak awmchhun phalna nei lo a zuar ho zawng zawng te hi phalna pe vek tur in kan phut law law bawk a ni,” tiin thuchhuah an siam.
