AAP Mizoram chuan vawiin khan Aizawl Press Club-ah state president Andrew Lalremkima hovin chanchinthar thehdarhtute kawmin, kumin Lok Sabha inthlan lo awm turah candidate an neih dawn loh thu leh, mahse central-a INDIA Alliance hnuaiah Congress-te nen thawhhona an neih mek avang leh, Delhi lama an hruaituten BJP paihthlak a, democracy tun din a nih beiseiin Pu Lalbiakzama, INC candidate chu lawm takin an thawhpui dawn a. Kumin inthlan hunah pawh a theih ang angin an pui dawn tih an puang a ni.
Andrew Lalremkima chuan, “Kan hriat theuh angin BJP sawrkarna hnuaiah Eptu Party-te rahbehin kan awm nasa hle a, dan hrang hrangte siam tharin kan pu ber Arvind Kejriwal-a pawh Prevention of Money Laundering Act hnuaiah jail-ah an khung mek a ni. Ani bakah hian kan minister pahnih jail-ah an khung mek a, mi dang pawh an vau reng bawk a ni. Kan hotute chunga ah chet dan hian AAP hi an hlau hle a ni tih a entir a ni.
“Manipur ram buai pawh tun thlenga chinfel an la tum loh lai leh ram chhunga tha taka rorel aiin eptu party-te beih hi mutmawh hnarmawh berah an nei niin a lang. Kan ramah pawh, BJP-in MLA an neihna hmunte uluk taka mipuiten kan ngaiven a țul hle a, Mizoram development ai chuan hnam hrang hang awmte hi min thendarh leh min inhuattir hi an duh ber niin a lang.
“Sum leh thuneihna hmangin thiam takin lamțang an siam mek a, North East India-ah Mizoramah chiah lalna an chan theih loh avangin theihtawp an chhuah mek a ni. He party hian Hindu lalna ram siam an tum avangin Mizoram mipuite hian BJP leh a thawhpui NDA Alliance hi kan zirchian a, India ram Prime Minister-in Hindu Sakhua a vawrh lar dante leh a hmalakna zawng zawngte en hian keini kristiante nen chuan engti kawng mahin kan inmil ngai dawn lo a ni tih hi kan hriat a tul a ni,” a ti bawk.
