AAP Mizoram chuan thuchhuah siamin, “Hmanni lawkah Portugal Minister of Health, Marta Temido-i, kum 48 chu an ram mi leh sa pawh nilo, Indian mi leh sa, Portugal damdawi in a a thih avangin a hna atangin a bang tih kan hria. Kha thil thleng kha ama tih chu a nih hauh lo, a staff-te fimkhur tawk loh avang a ni. Mahse a ni chuan kha department a lal ber a nih avang in ama mawhah a la a, a hna chhunzawm zel tlakah a in ngai lo a ni.
“Tun hnaiah current man avangin Mizoram chhungah nunna chan pali ngawt an awm a, hetiang thil hi a vawikhat thlenna a ni tawh lo a, kan ramah ngei vawi engemawzat a thleng tawh a ni. AAP Mizoram chuan pawi kan ti hle a, an kalsan takte Lalpa’n thlamuanin awmpui se tih hi kan ṭawngṭaina a ni.
“Hetianga chhiatna thleng fo hi ṭha kan ti lo hle a, tun chinah chuan hetiang chhiatna thleng theiah hian fimkhurin a department changtute hian an department chante hi vil ngun tawh se. Mihring nunna hlu tak channa hial a thlen hi chuan department changtu ber pawh hian an mawhah la ngam ṭhin se la. Tuna chhiatna thleng a kan Minister pawh hian midang kawh kual tur zawng loin amah hi mawhphur hmasa bertu a ni tih in hria sela, a hna aṭangin bang ngam rawh se, tih hi keini Mizoram AAP-te chuan kan phut tlat a ni. Tin, he chhiat tawhna thlenga boral ta chhungte hnenah hian zangnadawmna sawrkarin pe ngei ngei bawk rawh se,” tiin an tarlang.
