Vawiin khan AAP Mizoram State Vice President Pu C.Lalkhuma chuan an pisa ah thuchhuah siamin BJP chet dan na takin a dem.
Pu C.Lalkhuma chuan, “Manipur State a buaina chungchangah hian sawi tur tam tak awm mahse, sawrkar inrelbawlna fel lovin a nghawng chhuah chu kan unau ten an tuar ta hi a ni. He buaina hi Manipur a kan unau te chauhvin an tuar a ni lo va, Zohnahthlak khawvel hmun tina awm ten kan tuar ta a ni a ti.
“India ram BJP Rorelna hnuaiah Kristian te kan hlim lovin hnam tenau thlengin kan him lovin, Sakhuana lam atanga kan thlir pawhin Kristian te leh Muslim tan phurrit a tam sawt hle chuvang chuan Manipur State a BJP Rorelna pawh Kristianna leh Tribal hnam te tan phurrit a lo nita a ni. Rilru fim taka ngaihtuahin Political Party-ah pawh awmna tur kan thlan thiam a ngai dawn ta hle a ni, Kristian BJP kan ni tih te bengin kan hria a, kan ram Mizoram chhungah ngei pawh chu thu chu lam rikin a awm a. Central BJP hnuaia awm State hrang hrang BJP te kal dana hi kan zirchian a hun ta. Hnam hnufual zawk leh Hindu Sakhaw be velo, Sakhaw dang biate tan an kaihhruaina hnuaiah hian kan him loh zia hi kan zirchhuak pha ngei tur a ni.
“Kan unau te lu la a, pal a an han tar ta mai hi AAP Mizoram te chuan tawrh hrehawm kan ti in kan na takzet a, India rama thleng atan chuan rapthlak lutukah ngaiin India ram ah hetiang hi thleng leh tawh ngai lo se kan duh takzet a ni. Mi nunrawng leh awm ngaihna hrelo te thil tih ni awm tak mihring han tih theih pawha ni awma lang lo, kan unau te chunga thleng ta hi kan tuar thiamlo takzet a ni,” a ti.
C.Lalkhuma chuan, “He thil thleng hi sawi dan tur tawk pawh thiam har ka ti hle. Kan unau te tap leh rum thawm te zankhaw thim hnuaia an vahvaihna kawng te hmuh pui vek lo mah ila, kan hriat theih chin ngawt pawh hian min ti rum a, Mizoram chhunga awm mai ni lovin khawvel hmun tinah Zohnahthlak ten kan tawrhpuiin min ti rum tak meuh a nih hi. Zohnahthlak te kan tap a, he kan tawrhna hian van a nghawr nghing a ni,” a ti bawk.
