AH &Vety Minister Dr K. Beichhua chuan vawiin khan PIGFED Ltd. Annual General Meeting, Vety Polyclinic Conference Hall, Aizawla neih chu khuallian niin a hmanpui.
Dr K.Beichhua chuan African Swine Fever leng avangin nasa taka vawkvulhtuten an tuar chu pawi a tih thu a sawi a. He hri leng avanga Mizoram dung leh vanga vawk suat (cull) te zangnadawmna tur sawrkarin a buaipui mek pawh a hmawr an bawk thei tep tawh, a ti a. Amah ngeiin sawrkar laipuia Minister te a dawr thu sawiin state leh central nen 50:50 in zangnadawmna hi kalpui a ni dawn a, sawrkar laipui lam chuan cheng vaibelchhe 5 chuang an rawn pe tawh a, a do letna tur State Sawrkarin a allocate tawh bawk a, tun atanga reilote ah expenditure sanction hmuh a ni dawn tih Minister chuan a sawi.
Dr K.Beichhua chuan PRRS nasa takin a lo leng tawh a, ASF in Mizoram a nuai leh a, vawkvulhtute an lainatawm tak zet a, saa intodelh tura hmalakna pawh nasa taka a sukuk ta chu a vanduaithlak hle a ni, a ti a. Heng vanduaina te hi tawk mahila zam mai tur kan ni lo, tiin Minister chuan a ti a. ASF thawh khatna nasa takin kan tuar a, thawh hnihna a leng leh mek a, a do hneh tur chuan mi thiam zawkten tih leh tih loh tur thurawn an pek te ngaih pawimawh a tul tih hre thar leh turin mipuite a chah a. State pawn lam atanga vawk lak luh khap te, ASF avanga vawk thi an awmin vawk in chu thla ruk tal tihruah tur, tih te leh vawk hri laka himna tura inkaihhruaina pawimawh dang sawkarin a siam te chu zawm ngei turin mipuite Dr K.Beichhua chuan a chah nawn leh a ni.
PIGFED hian ASF hripui leng an tuar nasa hle a. Thenzawla an farm ah vawk 53 an thi a, 208 zet suat an ni bawk a. Selesiha an farm ah vawi 15 an thi a, 33 suat an ni bawk. ASF avang hian heng an farm pahniha vawk an vulhte hi an mang vek a ni. Hetihlai hian sawrkarin PIGFED Ltd. kuta a dah ranchaw siamna Animal Feed Plant, Tanhril atangin ran chaw engemawzat an hralh chhuak reng a, hei hian PIGFED sum lak luhna kawngah a pui nasa hle. PIGFED hi June 6, 1989 khan din niin tunah hian an hnuaiah society 163 an awm a. He Federation din chhan leh tum bulpui ber chu vawkvulh leh a kaihhnawih thila member te hmasawnna tura hma lak te, member te zirtir leh kaihhruaina pek te a ni.
Programme hi PIGFED Ltd. Chairman F.Zosanga’n a kaihruai a. AH &Vety Director Dr Lalremliana leh Registrar Cooperative Societies aiawh Vanhlupuia te pawhin thu an sawi. Chawhnuah rorelna hun an hmang zui a ni.
