Rural Development Minister Lalruatkima chuan vawiin khan Sateek-ah Wholesale Market-cum-Guest House a hawng a, Aibawk-ah Rurban Cluster Training Centre-cum-BDO’s office a hawng bawk. Bialtu MLA, Horticulture Development Board Vice-Chairman ni bawk Prof. F. Lalnunmawia’n Minister hi a tawiawm a ni.
Hawnna puala inkhawm Rurban Cluster Training Centre Conference Hall, Aibawk-a buatsaihah khuallian Lalruatkima chuan thu sawiin, thingtlang khua in hma an sawnna turin scheme hrang hrang kaltlangin Rural Development Department in hna a thawk a, Aibawk RD Block ah pawh hna tam tak kan thawk a, a hlawhtlinna kan hmu chho zel hi a lawmawm takzet a ni, a ti a. SPMRM hi 2016 ah Aibawk cluster ah tan a ni a, tlangramah chuan Cluster khatah mihring 5000-15000 inkar an awm a ngaih avangin Aibawk RD Block khua zawng zawng kan tuam thei lova, khaw 9 he cluster ah hian an awm a, khawtlang hruaitute leh mipuite rawn chungin official ten mithiam an ruaina, theihtawp an chhuah a ni, a ti a. Kan thawh that vangin cluster dang 3 (Khawzawl, Thingsulthliah leh East Lungdar) min pek belh hial a, cluster 4 kan nei tawha, tunah hian thingtlang khua ten khawpui anga hmasawnna ruhrel (infrastructute) an neih ve theihnan kan theih chinah tluang takin kan thawk mek zel a ni, a ti a. State Performance indicator ah India ram pumah pathumna kan ni hial a ni a ti a, Cluster based performance indicator ah Aibawk cluster hi India ram pumah pakhatna a ni bawk a, hei hi kan officer te leh staff te bakah Village Council leh mipuite thawhhona a that vang a ni, a ti a. Kan hlawhtlinna hi mipuite vang a ni a ti a. Cluster dang siam belh zel tura kan inruahman laiin sawrkar laipuiin he scheme hi a titawp dawn tih thuthang kan hria a, theihtawp chhuahin kan bawhzui a, Union Minister mai bakah Prime Minister thlengin D.O letter in kan umzui a, thu thar kan hriat hnaih berah chuan Finance Ministry kutah a awm tih a ni a, chhunzawm a nih ngei theihnan theihtawp kan chhuah reng a ni, a ti.
Sateek Wholesale Market-cum-Guest House hi Shyama Prasad Mukherji Rurban Mission (SPMRM) hnuaiah cheng nuai 350 senga sak a ni a, a satu hi Mizoram Technocrats Company, Tuikhuahtlang, Aizawl ten an ni. A project hming hi “Construction of Wholesale Market-cum-Guest House at Sateek” a ni a, January ni 4, 2021 khan sak tan niin April ni 28, 2022 khan sak zawh a ni a, thla 18 chhunga sak zawh tura ruahman kha thla 16 chhungin sak zawh hman a ni. A building hi IS Code for Seismic Zone-V specifications anga an design a ni a, concrete structure atan hian Mix Design – IS Grade 15 (M-15) & Grade 20 (M-20) hman a ni a, Steel Reinforcement Design & bar bending zawng zawng hi IS 456 Design Specifications anga siam a ni.
Building hi floor 4 a sak niin, basement hi 225 sqm a zau a ni a, ground floor, first floor leh second floor hi 249 sqm a zau theuh an ni thung.
Basement hi lirthei dahna (vehicle parking) atana ruahman niin lirthei (LMV) 6 a leng a, Ground Floor-ah hian canteen 1, store room 1, mipa leh hmeichhe inthiarna (toilet) 1 ve ve, wholesale area leh auction centre 1 ve ve, display area 6 leh lirthei ke chhia siamna (tyre works) 1 a awm a ni. First Floor ah hian Guest room 4 (Double room 2, Dormitory 2) bathroom attached awmin, reception counter leh lounge a awm bawk a ni. Second Floor ah hian VIP room (A/C) 4 bathroom attached, choka, Dining Hall-cum-Restaurant leh Chowkider quarters te a awm a ni. Ruahtui dahkhawlna tur RCC Tanky litre 30,000 dawng a awm bawk a ni.
Wholesale Market leh Guest House enkawl dan tur chungchangah inremna thuthlung (MoU) ziah a ni a, inremna thuthlungah hian Rural Development Secretary, MzSRLM Chief Executive Officer leh Aibawk BDO ten hming an ziak a ni.
Aibawk Rurban Cluster Training Centre-cum-BDO’s office hi chhawng hnih niin phase hnih a sak a ni a, phase khatna ah Ground Floor, BDO office ni bawk hi MGNREGS (MC) leh MzSRLM convergence a sak a ni a, cheng nuai 23.5 (MGNREGS – nuai 18,50,000/- MzSRM – nuai 5/-) sen niin July 2020 a sak tan, March, 2021 a sak zawh a ni.
Phase hnihna ah a chhawng chung zawk (first floor) Rurban Cluster Training Centre hi sak niin Shyama Prasad Mukherji Rurban Mission (SPMRM) leh MGNREGS convergence a sak a ni a. Rs. 30,66,000/- (SPMRM – Rs. 25,66,000/- leh MGNREGS – Rs. 5,00,000/-) senga sak niin a dung lam feet 44, a vang lam feet 34 a ni a, October, 2021 a sak tan March, 2022 a sak zawh a ni a. Sound system, Projector leh dawhkan, chair thahnem tak dah a ni.
