August 25, 2023 (Zirtawpni) hian All India Congress Committee hruaitu Shri Bhakta Charan Das, AICC (i/c Mizoram) & Ex-Union Minister, Shri Sachin Rao, Observer for Mizoram AICC, Shri Mathew Antony, Spokesperson, AICC leh Pu C.S Thanga GS MPCC (i/c AICC) te leh Central YMA hruaitute chu Central YMA Office, Tuikhuahtlangah an in kawm.
Mizoram rawn tlawha zin AICC hruaitute leh Central YMA hruaitute chu Central YMA office-ah an inkawm a. AICC hruaitute chuan Congress-in Central leh Mizoramah sorkarna an chan chuan UCC leh Forest (Conservation) Amendment Act, 2023 chu Hnam tlem zawk leh sakhaw dang tan a him loh avangin an thiat dawn a, an kal pui ve dawn lo tih an sawi a. Forest (Conservation) Amendment Bill, 2023 chu ram neitute tan a him lova, mahni ramah pawh thunei thei loa awm chu mihring dikna leh chanvo palzutna nasa tak a ni a, kalpui chi a ni lo, an ti.
AICC hruaitute chuan, sakhaw tlem zawk te tana dan him lo, in nekchep leh chimral tuma in rikrapna leh rawva taka sakhaw dang vuantute nghaisak hi Congress Party chuan Congress Party a din tirh atanga a do tlat, tih reh a tum pawh a ni. Hetianga sakhaw dang nekchepna hi State-ah leh Central-a Congress a sorkar chuan a ti reh tura hmalakna hmasa tur zinga mi a ni. Central YMA hian min support rawh u, kan ti a ni lova, Congress Party in sakhaw hrang hrang te leh hnam tlem zawkte tana kan ngaihdan leh kan dinna hi hria u la kan duh vang a ni, an ti bawk.
CYMA te chuan ‘Ram leh Hnam humhalh’ a pawimawhzia sawiin, hnam tlem zawk leh sakhaw dang te tana Congress party dinhmun leh an hmalakna an hriat thu an sawi a. Sakhaw zalenna (Secularism) pawimawhzia sawiin, BJP ina India ram an sawisak dan a pawizia leh Mizoram pawh a tuar mai thei dinhmuna ding kan nih thu an sawi a. Party mal anga thlawp (Support) an neih ngai loh thu an sawi bakah an hmalakna a that thu an sawi bawk a ni.
