MZP General Headquarters Aizawl chuan, “Kan sawrkarin zirtirtu aikal la titawp tura a hmalakna hi ṭha kan tiin, kan thlawp a. Tunhma atanga kan lo vei tawh a nih avangin sawrkarin hetianga hma a la ngam hi kan lawm em em a ni,” an ti.
Vawiin khan MZP hruaitutechuan an Pisa puiah Chanchinthar lakhawmtute kawmin, “Zirtirtu aikal lak chungchang hi MZP General Headquarters Executive Meeting vawi 627-na, ni 23 January, 2024 a thukhawmin a rel angin, ni 10 February, 2024 ral hmaa MZP General Headquarters-ah Report tura hriattîrna chhuah a ni a. Nimahsela, Mizoram sorkarin aikal lak chungchangah hma a lak mek avangin thlithlai reng chunga ngaihchan zui a ni ta rih a ni.
“Zirtirtu aikal lak hi tihtawp tumin Mizoram sawrkarin nasa takin a bei zui tih kan hria a. Mizoram Legislative Assembly 9-na thut khawm, tum thumna neihah pawh sawi a hlawh a. Sawrkar sikulah aikal lak hi tih tawp a nih tawh thu pawh sawi chhuah a ni. Chutih laiin khawi emaw kil khatah sawrkar hmalakna zawm duhlo leh ngaipawimawh lo an awm ngeia sawi a ni thung a.
“MZP Executive Committee Meeting vawi- 640 na ni 18 March, 2025 (Thawhlehni) a neih chuan, zirtîrtu aikal la tihtawp a nih theih nan MZP rorelna sang Federal Council Sitting Agenda atan a pawm a. Hetih mek lai hian zirtirtu aikal late March thla chhung ngei a MZP General Headquarters hnena report tura thu chhuah a ni a. Report pawh a rawn lut a ni.
“MZP Federal Council Sitting vawi 58-na ni 2 May 2025 (Zirtawpni) a thukhawm chuan Zirtirtu aikal la te chungchang chu ngun taka a ngaihtuah hnuin, Zirtirtu aikal late lakah sorkarin action a lak theih nan MZP in hma la rawh se tiin a rel a, June ni 13, 2025(Zirtawpni) ral hma ngeiin aikal la te lakah hian sawrkarin action a lak ngei kan phut a ni.
“MZP General Headquarters chuan zirtîrtu aikal late a chhui zui zel a. Report tur neite tan Phone number tarlangin, flyer te a thehdarh a. Vawiin thlengin, district 6(paruk) atangin, sikul 14(sawm pali) a thawk, mi 22(sawmhnih pahnih)aikal la report kan dawng a ni.(Enclosed copy)
“MZP-in zirtirtu aikal laite kan dap tih an hriat avanga, aikal la ngam lote an awm a. Report kan dawn hnua aikal la ngam tawh lo, lo thawk leh te pawh an awm a. Vawiin kan thusawi avanga, aikal la si thawk leh pawh an awm ngei kan ring a ni.
“MZP chuan Mizoram sawrkar hnuaia thawk tura lak zirtirtute hian, lak an nih ang ngeiin an mahni ngeiin thawk se a duh a. Hlawh ṭha tak sawrkarin a pek, training engkim a buatsaih sakte ngeiin Pathian rawngbawlnaah ngaiin thahnemngai takin thawk se Mizoram zirna pawhin hma a sawn pui ngei a ring a. Mahni eizawnna leh hlawh tam tak an hmuhna pawh rinawm taka thawk thei lote hi sawrkar in banin, a thawk duh leh thawk peihte la turin MZP chuan sawrkar a ngen a ni,” an ti bawk.
