Vawiin ni 1 April, 2022 (Zirtawpni) hian MNF party chuan Mizo Hnam Run Chhung Inkhawm nei a. He hunah hian Wg.Cdr.Pu J.Lalhmingliana, Principal Consultant, Civil Aviation Wing chuan thusawiin, MNF Ministry-in thlawhtheihna chungchanga a hmalak dan hrang hrangte a sawi a. Lengpui Airport chungchang sawiin, “Lengpui Airport hian ni March ni 24-27 khan Asia khawmualpui huap khawmpuiah pawh lawmman a lo dawng tawh a ni,” a ti.
Pu J.Hminga chuan, “UDAN-RCS-a regular taka thlawhtheihna a kal theihna tur, mipui an tlem emaw an tam emaw pawha thlawhtheihna an kal hrim hrimna tur scheme chu tih tan a ni ta a, he scheme-in a tum ber chu a lian emaw a te emaw, mipui ban phakin connection a awm tur a ni. A hmaa connection kan neih ngai lohnaah kan nei ta thluah a, Northeast-ah chuan Mizoram hi Interstate Capital Connectivity nei tha ber kan ni ta a ni. Regional Connectitivty-ah hian a hmang regular ber lawrlak kan nih avangin Award kan dawng ta reng a ni,” a ti.
Pu J.Hminga chuan, “Helicopter service kan neih mek Pawan Hans hi chuang thei an tam lova, sorkar laipui chuan a aia lian, company dang zawng turin thu min rawn a, tunah hian kan hotuten an ngaihven mek a, a man to deuh chi ṭha tak company pahnih(2) neih tumin hmalak mek a ni a, Airline service leh Airport tihchangtlun nan hian kan sawrkar hian hma nasa takin a la a, MBJP-ten Covid vanga tawrhna doletna tur sum chu Lengpui Airport siam nan an hmang te min ti, an hriat loh vang a ni. Lengpui Airport hi ‘North East Special Infrastructure Development Scheme’ (NESIDS) hmanga siam a ni,” a ti a. Pu J.Hminga chuan, “Lengpui Airport hi North East-ah chuan a tha pawl tak a ni a, a bik takin kan CM hian a ngai pawimawh em em a, a tirah nitin passenger 300 lut leh chhuak dawlzo turin siam a ni a, tunah hian kan CM ruahhmanna vekin nitin lut leh chhuak hi mi 1600 vel zel an ni a, a aia lian passeneger 2800 vel lut leh chhuak dawlzo turin kan siam mek a ni. CM Pu Zoramthanga hmalaknain rah a chhuah hunah chuan kan chhuang khawp ang, a building leh a service-ah pawh kan chhuang hle dawn tih ka sawi ngam a ni, a ti.
Pu J. Hminga chuan , “Hmanni lawkah vanduaithlak takin a chim a, a ri a ring khawp mai, amaherawh chu, khami chhiatna avang khan Mizoram sawrkar hian chengkhat pawh a sen belh dawn lo a, Political advantage lo lak tumte kan awm kha a zialo ka ti hle a, a contractor-in ama sum sengin a siam leh vek tur thu hi amah atang ngeiin lehkha kan dawng nghal a ni. Kum 11 kaltaa sawrkar hmasain DVRO an bun duh loh, an hluihlawn kha Hmunpui tlangah khuan kan sorkarin a dah fel thlap tawh a ni,” a ti bawk.
