MZP General Headquarters hruaitute chuan vawiin khan Lalchamliana, Mizoram Home Minister chu a Office-ah hmuin, Lengpui Airport leh Mizoram hmun hrang hrang Inner Line Permit (ILP) check post-ah Mizoram state pawn atanga zohnahthlakte, Mizoram lolutte tih luihna hmanga ILP check sak an awm chungchang an sawipui.
Hemi chungchangah thuchhuah an siamah, “MZP chuan Zofate inpumkhatna leh insuihkhawmna a ngai pawimawh em em a. Hemi kawnga MZP in hma alak mek laiin tunhnaiah kan unau kan thisen zawmpui, Mizoram state thenawm atanga lo zin ten Lengpui Airport leh Mizoram hmun hrang hrang ILP check post-ah tih luihna hmanga ILP check sak leh ILP siam luih tir avanga harsatna tawk an awm tih MZP in a hriatin thinur thlak a tiin hriatthiam har a ti takzet a. Kan unaute hnam dang ang maia cheibawla tih luihna hmanga ILP check sak anni hi thawktute inthlahdah vangah MZP chuan angai a, Home Department pawh a mawhphurtu ah angai a. Unau hmelhai a thlen palh MZP a hlau a ni. He thil hi thleng nawn tawh lo turin MZP chuan a duh avangin Home Minister sawipui a ni a. Home Minister chuan hemi chungchang hi a ngaih pawimawh thu leh hma lak nghal anih tur thu a lo sawi.
“MZP chuan khawvel hmun hrang hranga zofaten inpumkhatna tha zawk kan neih theih nan ruahmanna siamin Zohnam khawmpui lian (ZOFEST) pawh December 2022 thla chawhma lamah hian neih tumin ruahmanna a siam mek a. He programme hmang tura palai lokal ten harsatna an tawh loh nan thuneitute pawh uluk zawka ILP check post vil tur leh unau hmelhai a awm lohna tura hma la turin MZP chuan thuneitute a ngen a ni,” tiin an tarlang a ni.
