Working Committee on Ruihhlo Do buatsaihin vawiin chawhnu dar 12:45 khan Aizawlah Ruihhlo Do Kawng Zawhpui huaihawt a ni a. Hemi puala hun hman hi Social Welfare & Tribal Affairs Minister Er. Lalrinawma, Chairman, Working Committee on Ruihhlo Do chuan khuallian niin a hmanpui a ni.
Ruihhlo Do Kawng Zawhpui puala Raj Bhavan Northern Gate-a hun hmanah khuallian Social Welfare & Tribal Affairs Minister Er. Lalrinawma chuan Ruihhlo Do Kawng Zawhpui buatsaiha thalai tam tak an tel thei leh ruihhlo do kawnga hmalaknain thlawpna tha tak a dawng chu ropui a tih thu sawiin, hemi tihlawhtling tura pen chhuak zawng zawngte fakawm a tih thu a sawi a. Ruihhloin min run mek karah Sawrkarin theihtawp a chhuah a, State, District leh Village level thlenga awmze nei zawka hmalak a nih theih nan ruahmanna siam mek zel a nih thu a sawi a; mipuite chu kan ram leh hnam chhanna tur a ni tih hriaa a hlawhtlin theih nana tanpuitu leh tawiawmtu nih tum theuh turin a sawm a ni.
Excise & Narcotics Minister ni bawk Er. Lalrinawma chuan ruihhlo leh a kaihhnawihte do kawngah Sawrkar leh YMA bakah NGO dang leh Kohhran te’n theihtawp an chhuah thin chu lawmawm tiin, thahnemngai taka ke pen chhunzawm zel turin a chah a. Nunna hlu tak chhan nan ruihhlo do let a tul thu sawiin, Pathianin taksa tha tak min pek hi ruihhlo leh a kaihhnawih lakah kan venghim tur a ni, a ti. Kalkhawmte chu mi ai baka nawm tumna thlahlel lo tur leh kan nawm theih dan tur bera Pathianin min siam dan leh hemi mila ruahmanna a siamte zah thiam turin a chah a. Mipuite chu ruihhlo do hna chu Sawrkar Department chanah dah bik mai lova, kan zavaia mawhphurhna a ni tih hriaa theihtawp chhuaha tanrualpuiah a sawm nghal bawk.
Hemi puala hun hman hi Pi C.Zodinpuii, Joint Director, Social Welfare & Tribal Affairs Department chuan kaihruaiin Pu R.Lalngheta, President, CYMA & Vice Chairman, Core Committee on Ruihhlo Do chuan inlawmna thu a sawi a. Pu Lalduhawma Chawngthu, Pu H.Lalthianghlima, President, MZP General Hqrs. leh Pu Lalramhluna Fanai, Gen Secretary, MSU General Hqrs. te’n thu an sawi bawk a. Pu Vanlalmalsawmdawngliana, Joint Commissioner of Excise & Narcotics Department-in lawmthu sawiin hun hman a khar a ni.
Ruihhlo Do Kawng Zawhpui hi thuang hniha neih niin, Millenium Centre kawt leh Sikulpuikawn atangin chawhnu dar 12:45 ah program neihna hmun tur Raj Bhava Northern Gate pana neih a ni a. Ruihhlo chu kan ram hmelma a nih thu leh ruihhlo tel lova kan hlim theih thu te, ruihhlo zuartute chu ram leh hnam hmelma an nih thu leh ruihhlo tel lova ram nuam siam tura tanrual a pawimawh thute bakah, ruihhlo man chhuahna kawngah Sawrkar tawiawm zel a pawimawh thute an auchhuahpui a. Ruihhlo leh a kaihhnawih laka inhnamhnawih lo tur leh ruihhlo do kawnga theihtawp chhuah turin thutiam an la nghal bawk a ni.
