Dt 28.05.22 Zingkar ah Congress Party chuan Bazarpui, chhungkaw 2,000 chuang zet ten eizawnna atana an hman New Market Building sak chhunzawm mai loh chungchangah helai hmun a eizawngte thlavang hauh na hun, New Market-ah hman a ni a. He hun hi Pu VF Lalzarliana, Secretary MPCC chuan kaihruaiin, Pu Vanthangpuia, Aizawl East II Block President-in hun tawp a siam.
He hun a thusawitu Pu H.Rohluna, General Secretary MPCC, Congress sorkar laia Trade & Commerce changtu chuan ‘He Bazarpui chei ṭhaṭ hna hi Congress sawrkar laia bul ṭan niin, MNF a rawn sawrkar hnu khan chhunzawm mai loin kum khat leh a chanve teh meuh mai pawisa awmsa hman nghal mai theih chu hmang phal lo a, chhungkaw 2,000 chuangte eizawnna ngaihtuah miah lo a an lal zui kha a pawi kan ti hle a. Vawiin thleng pawha a ngaihthah zui zel hi Congress Party chuan pawi a ti takzet a ni. MNF sawrkar hian he laia eizawngte a ngaihthah em avang hian chhungkaw tam tak economy a ti chhia a, pawisa a awm rih lo ti thin mah se, Kamrula-te tan chuan an nei reng tho a nih tih hretu tan chuan an ngaihpawimawh zawng a nih loh vang mai a ni tih hi a chiang em em a ni. Pathian leh mipuite zarah Congress party hi a sawrkar leh a nih chuan hun hmasa lam ang bawkin he lai hmun hi kan ngaipawimawh leh dawn a, he laia eizawng ṭhenkhatte tuihawk nena in in chiahpiah hi kan phal ve dawn lo a ni,” a ti.
Pu Rosiamngheta, AMC Councillor, Secretary MPCC pawhin thusawiin, “Sawrkar thaah chuan mipuiin chanvo tha an nei ṭhin a. Mizoramah erawh chuan kan eizawnna, kan bazarpui building sakna tur Congress Party-in a dah pawh MNF sorkar chuan an dah bo daih duh a, chuvang chuan kei chuan MNF sawrkar hi sorkar tha ka ti thei lo a ni. MNF sawrkar hi Wheelbarrow sawrkar an ni tih hi a chiangin ka hria, an hniak hi chhui ila nawr chin zelah a tawp tih mipuite hian kan hmu thei a ni. Mipuite hi bum tlak kan ni tawh lo; khai chhuah tlak erawh kan la ni tih hi vawiin ni a sawrkar lai hi ka hrilh duh a ni,” a ti bawk.
Pu TT Zothansanga General Secretary MPCC pawh in thu sawiin, “Sawrkar hian a tih tur a tih lohah COVID-19 a chhuanlam leh ṭhin a, hei hi thutlingah Congress Party chuan a ngai lo; a ngaihpawimawh leh ngaihpawimawh lohah a in nghat mai mai a ni. Heng chhungkaw 2,000 chuang eizawnna hi ngaihsak ni se chu Chief Minister hian a Department chanah budget zawng zawng aṭanga 34% lai a neih bakah, Finance Department-ah ringawt pawh Vaibelchhe 3,112 lai a neih aṭang hian a sa thei tih hi thilchiang a ni. Chuvangin, COVID-19 emaw pawisa awm lo tih emaw hi chhuanlam tlingah Congress party chuan a ngai lo a ni,” ti bawk.
