MNF Party Treasurer Lalruatkima, Ex-Minister kaihhruaiin vawiin khan Aizawl Press Club-ah chanchinthar lakhawmtute kawmna hun neih a ni a, MNF Adviser Er. K.Lalsawmvela chuan, Road Infrastructure Development lama MNF sorkar kaltain a hmalakna pawimawh thenkhat a sawi.
Er. K.Lalsawmvela chuan, “Aizawl helna (bypass road) Aizawl chhuah lama kan neihsa (world bank road kan tih mai) bakah a dang pahnih ruahman a ni tih kan hre tawh a, ‘Aizawl bypass road on the western side’ kan tih, Airport kawng, Sihhmui atanga penga, Tlawng kamah, Samtlang leh Lungleng inkara phei a, Muallungthu rama Lunglei kawng pawh tur, Km 45 a thui sial nan, State Sawrkar rawtna chu pawmin PMDevIne hnuaiah Rs.500 Crore lai a hranpa ngatin Union budget-a dah a ni a.
“DPR February 2023-a thehluh chu mimal ram a sut tur compensation leh forest clearance tifel hmasa tura central-in a rawn tih avangin project a khawtlai lo thei lova. An duhdana tifel a, November 2023-a thehluh anih hnuah March 9, 2024 khan PWD chuan double lane road turin tender a chhuah tawh a. April 30,2024-ah tender hawn a ni ang. He project pawimawh tak MNF Sawrkar ruahman, harsatna tam tak paltlanga hlawhtlinna lo awm ta hi lawmawm kan ti hle a. Sawrkar thar hian tha taka a hlen chhuah ngei kan duhin kan beisei a ni.
“Aizawl Hmar lama Aizawl bypass; Silchar-Aizawl four-lane road tawp, Sairang chhak atanga intan hi Contract package 3-ah siam a ni a. He kawng kaldan tur NHIDCL Consultant-in rawtna 3 a siam chu Chief Minister hova sawi hovin, CM duhdan tak chu NHIDCL lam pawhin pawmin, final a ni ta a. Khawmual chin, Package 1 leh 3 chu March 2023 khan Contractor hnenah hna pekfel a ni tawh a. Compensation leh forest clearance fel loh vanga hna tan hrih loh mai a ni a. a kawng kaldan tur chu kan hre tawhin ka ring a. Package 2 bik, Leiverh thu hi sawifiah tul a awm a.
“Kan CM zahawmtak Pu Duha chuan 08.01.2024-a ZPM office-a a Delhi zin report a pek khan Leiverh bik hi harsatna deuh awm a, cancel hial an tum mek, Nitin Gadkari, MoRT&H Minister a sawipui hnua pawm leh ni ta angin a sawi a. Hei hi thangthat lak duh vanga mipui rilru dik lova hruaikawi tumna emaw, hriat chian loh vang emaw niin a lang. Thil awm dan dik tak, NHIDCL hotute hnen atanga kan hriat dan chu hetiang hi a ni: ‘Aizawl bypass tunnel hi, engtiklai mahin, khawi level-ah mah cancel emaw, enthat turin emaw rawtna a awm ngai lova.
“Package 1 leh 3 contract pek vek hnuah a lai a mi package 2 cancell hi thil tih chi hauh loh a ni a. Chu bakah tunnel pawh hi October, 2023- ah tender chhuah tawh a ni a. Mizoram Assembly Election Model Code of Conduct-in min phuar avangin kan chawlhsan hrih a. MCC phelh hnu December 6, 2023-ah high level meeting-in DPR pawm turin a rel a, formal approval la tura hma lak nghal a ni’ tih a ni.
“Pu Duha’n January 4, 2024 vela Highway Minister a zu hmuh hian sanction tura file hian Minister a thleng vela, a hnu lawkah tweeter hmangin approve anih thu Minister hian a tarlang ta mai niin a lang. Tu emaw zu sawi vanga sanction ni lovin, a hma daih atanga ruahmanna fel tak awm sa, Minister-in Jany 4 vela a pawm, January 15, 2024-ah official sanction lo chhuak ta mai niin alang e. He Leiverh hna hi tender chhang tu 17 atangin IRCON International Ltd chu pek a ni ta a. Kum 3 chhung thawkin, kum 10 chhung maintain zui tura tih a ni.
“Tin, EPC mode contract hi ZPM Sawrkar-in kalpui an tum anih dan leh he Leiverh project EPC mode-a tih pawh hi Mizopram a vawikhatna nia hriat thu CM-in a sawi pawh kha hriat sual palh a ni. NH project-ah chuan 2018 atang khan State PWD hian a hmang tan daih tawh a. State PWD hna, Bamboo Link
Road pahnih pawh EPC mode a tender chhuah a ni tawh bawk a ni,” a ti.
