Vawiin ni 26.06.2023 hian Mizo Hnam Runah chhung inkhawmah MNF Adviser & Minister of State Pu Robert Romawia Royte chuan Hachhek bial atangin mi 30 chuang MNF-ah lawmlutin thu a sawi a. “Aizawl East-II ka tlanchhiat san lova, MNF Candidate tan ka rochun zawk a ni,” a ti.
Aizawl East-II bial a tlanchhiat san a nih loh thu leh a hnunga MNF candidate tan a rochun zawk thusawiin, “Kan nomination committee ten MNF candidate tur uluk takin an rawn thlang ang tih ka ring a. East-II bialah hian hneh takin a tling ang tih ka ring,” a ti.
Pu Robert Romawia chuan a dinna tur Hachhek bial mipuiten ramri leh hard area-a awm an nih avangin, ruling party bialtu neih an chak ve tawh, a ti a. Aizawl East-II ai chuan bial a hahthlak dawn tih pawh ka hria a, mahse vuivaiah ka la lo. Politics-a ka luh hian khawi bialah pawh ding turin ka inpeihsa hrim hrim a ni, a ti.
Zin report pein, high level committee on internally displaced person chuan raltlante a ngaihsak tih a sawi a. Delhi-ah home secretary a hmuh thu leh kan CM-in chhawmdawl a rawtna an pawm tih a sawi a. “Manipur buaina chhuah ni atanga vawiin thlengin kan sorkar hmalakna hi ropui ka ti a. Kan Chief Minister inpekna a ropuiin, home deptt officialte an fakawm hle,” a ti bawk.
“MNF chuan kan Manifesto (2018) No. 1-ah _Zofate rorelna pakhat hnuaia awmkhawm turin hmalak a ni ang_ tiin kan dah a. Anmahni kuangkuaha va hnaih turin zo kutpuite kan buatsaih a. State pawn bakah Tahan leh Maryland thlengin zofate insuihkhawm nan budgetah pawisa kan dah a, covid avangin kan tihhlawhtling thei ta lo a ni,” a ti.
SASCI chungchangah Part-I 2023-24 atan Rs. nuai 20,000 min pek belh dawn, a ti a. New Delhi-ah Union Finance Secretary a kawm a, Mizoram CM Pu Zoramthanga a rawt angin Rs. nuai 20,000 chu Mizoram min pek belh a ni dawn a. In ka thlen rualin sanction order min rawn thawn, a ti bawk.
Pu Robert-a chuan SASCI pawisa rulh dan tur sawifiahin: “Mizoram Assembly-a state budget pass hmasaber chu Rs vbc 17 vel a ni. Kum 50 liam hnuah tuna kan budget hi Rs vbc 14,000 vel a ni. SASCI hi kum 50 hnuah rulh chauh tur a ni a. Kum 50 a vei leh meuh chuan rulh tur Rs. vbc 700 hi eng tham mah a ni lovang,” a ti.
“Sorkar tehna chu Manifesto tihhlawhtlin kawngah a ni,” a ti a. “Opposition party-ten kan manifesto-ah min teh rawh se. Congress sorkar lai khan ‘Manifesto atangin min teh rawh se’ an ti ve ngai em? Anni chuan kan inziah that siak an ti a nih kha. Pu Zoramthanga sorkar hi manifesto tihhlawhtling tam ber a ni. Kan manifesto pawn lama kan thawh ringawt pawh hi Congress kum 10 sorkar chhunga mi a zat tawh hial ang.”
Eptu party chungchangah Pu RRR-a chuan: “ZPM unaute hi nomination committee an thu a, an danpui an bawhchhe nghal. Bel keh phuarkhawm theih loh, lungawi lo thlemtu committee an tia, a thlemtute pawh an lungawi chuang lo. Han kehdarh lo chi an ni lo. MLA ding tur an thlan danah social media follower ngahte a nia. Tunah hian ZPM lam chu an beidawng tan a. Party pariata awm lawr tawh hi Chief Minister atan thlantlin an la awm lo,” a ti.
Congress sorkar sawiin: “Mizoramah lapse pui (mega lapse) vawi hnih a thleng tawh a. Financial management-ah expenditure management a pawimawh ang bawkin income management a pawimawh. Kum 10 sorkar tawh leh tun term sorkar income hi intam hleih tak a ni. Neihsa tlemte renchem aiin source dik tak atanga thawhchhuah tam a pawimawh zawk. A inren pun theih loh a, income capacity tihsan a ngai,” a ti.
MoS Pu RRR-a chuan: “ICT deptt-ah kumin (2023-24)-a kan budget chu Rs nuai 500 chauh a ni. Mahse Rs nuai 10,000 dawn kan thawkchhuak tawh. Tourism-ah kan budget Rs nuai 1,100 chauh a ni a, hnathawhna tur Rs nuai sing chuang kan nei der tawh a. SYS budget pawh Rs nuai 2,561 chauh a ni, mahsela sports school ringawt pawh panga (5) kan nei dawn. Kan deptt budget hi sports school pakhat sakna pawh a ni lo,” tiin thawhchhuah lam tanlak a pawimawh thu a sawi.
Inkhawm hi Pu HB Lianmunga, Adviser-in a kaihruai a. Pu Ramzauva, MNF Adviser-in hunserh a hmang a. Lawmluhte aiawhin Pu Joseph Lalrinmawia, President, BJP Morcha Darlak leh C. Ramdinthara, President, Mamit District BJP Morchai ten thu an sawi bawk.
