Ni 5, August 2022, zan dár 7:30 khan Central YMA buatsaih Aizawl khawpui chhung Branch YMA OB mi 6 theuhte intawhkhawm hun hman a ni a. YMA Branch 108 awmah Branch YMA 96 atangin hruaitu mi 426 an kal a. Central YMA OB mi 6 leh Central Executive Committee (CEC) member-te nen an vaiin YMA hruaitu mi 470 vêl zet an kal khawm a ni.
He intawhkhawm hi Central YMA President, Pu R. Lalngheta’n a kaihruai a. Pu Roneihthanga, Fin. Secretary in hunserh hmangin, Prof. Malsawmliana, Asst. Secretary, Central YMA in member kalkhawmte in hmelhriattirna leh inchhiarna hun a hmang a ni.
He intawhkhawmah hian *Thupui pahnih (2)* ngaihthlak a ni a. Thupui 1-na *YMA Kalphung Inzirtirna* tih sawitu Central YMA Gen. Secretary, Prof. Lalnuntluanga chuan, Khawvelin hma a sawn mek zel angin YMA pawhin hma kan sawn ve mek zel a. YMA thatna tura ngaihtuah seng tam tak kan awm mek zel laiin YMA hmalakna tawh phawt chu a do zawnga ke pen duh kan awm zel bawk a. YMA kalphung leh kal dan duh khawp lohna an sawi, lo tuipui viau thei YMA hruaitu hial pawh kan awm theih thu a sawi a. YMA hian a kal zelna turah kawngtha zawk a zawh theih nana thurâwn petu, hmalatu leh ngaihtuahna seng thin hruaitu kan mamawh thu sawiin, Sawisel ngam loh pawl (YMA) kan nih a hlauhawm thu a sawi bawk.
Thupui 2-na *”Ram leh Hnam Humhalhnan Ruihhlo Do”* tih chu Pu Lalhmachhuana, Central YMA Vice President leh Kumpuan Sub Committee Chairman ni bawk chuan a sawi a. Kan ram, kan hnam hi kan vanduai hle mai a, international boundary ven hneh si loh thui tak mai, in kal pawh awlsam em em si kan nei a. Hei hian ruihhlo leh dan lova sumdawnna (smuggling) tawlh rukna kal kawng kan ni a. Hnam tlem leh naupangtê kan ni a, kan population atanga chhut hian ruihhlo ngai kan tam lutuk hi a manganthlak tak zet zet a ni, a ti a. Kan thalai tam tak ruihhlo lak atanga chhan chhuak tur hian kil tin atangin kawng hrang hranga tan kan lak a ngaihthu uar takin a sawi a ni.
Chairman kaihhruaina in thupui ngaihthlak pahnihte atangin hruaitu kalkhawm ten sawi hona hun an hmang chhunzawm a. YMA kalphung atana tha an tih leh ruihhlo do tlan dan tura tha an tihte hruaitu engemaw zatin an sawi a. Sawitu tam ber chuan Central YMA kaihhruaina hnuaiah kawng hrang hranga ruihhlo do tu tur ruahmanna siam nise an ti a. Central YMA Committee-in ruahmanna rawn siam sela, khawpui chhung Branch hruaituten lo ngaihchan theuh nise tiin Chair atanga khaikhawm a ni. Pu Fabian Lalfakawma, Treasurer Central YMA in lawmthu sawiin Er. Lalrinmawia, CEC tawngtaiin he intawhkhawm hun hi tih tawp a ni.
