Vawiin khan Disaster Management & Rehabilitation Minister Prof. Lalnilawma leh Horticulture Minister Pu C. Lalsawivunga ten vawiin khan tunhnaia ruahsur nasat vanga Aizawl khawpui chhunga lei chet nasat deuhna hmun hrang hrang an tlawh.
Minister pahnihte hian Aizawl khawpui chhunga veng 6 – Venghlui, Dawrpui (Temple – Vaivakawn road), Mission Veng Kawltheihuan, Mission Vengthlang (Shalom Baptist Biak In – Tlawng road), Kulikawn Vengthlang leh Vaivakawn Zohnuai an tlawh a ni.
Venghlui lei chetna hi Venghlui Hmar Veng Dak Inpui thlangah a ni a, kilometre 2 bial vel che in chhungkaw 21 in an chenna in luah ngam lovin an riah chhuahsan a ni.
Dawrpui (Temple – Vaivakawn) road lei chetna hi Assam Rifles Biak In thlang a ni a, Temple – Vaivakawn road kawng thlang lam leh Dawrpui Kawngpui an a in engemawzat chu luah ngam loha rauhsan a ni bawk.
Mission Veng Kawltheihuan lei chetna pawh hi a bula concrete in pakhat luah ngam lohin rauhsan a ni a, a thlang lama mimal insak lai pawh khawih chhunzawm ngam lohin a awm a ni.
Mission Vengthlang a lei a chetna hi Shalom Baptist Biak In – Tlawng road ah a ni a, chhungkaw 15 chuangin an chenna in luah ngam lovin an inthiarchhuak bawk a ni.
Kulikawn Vengthlangah hian in 9 lei che hian a khawih a, chhungkaw 1 chu inluah ngam lovin an riak chhuak bawk a ni.
Vaivakawn Zohnuaiah hian khawtlangin hnatlang an ko a, lei che hian in 6 khawih tawhin chhungkaw 15 an inthiarchhuak tawh a ni.
Vaivakawnah hian bialtu MLA, Minister ni bawk Pu Lalnghinglova Hmar chuan Minister te ho lo dwwngsawngin hmalak nghalna tur pawipawh hmasa an sawiho nghal a, transformer sawn ngai hi a sawnna tur hmun tihfel veleh sawn nghal theihin inruahman fel a ni a, a bula LT ban pahnih thiah ngai a awm bawk, SIPMIU pipe puak keh naktuk zing atang siam that hna thawh nghal tum a ni a, kawng chhak lam drainage siam that vat tur a ni bawk a, a hnuai kawngpui Aizawl – Sairang road kawngpui a vang tan zawngin a khi tlang tawh bawk tih report a ni a, heng bakah hian ruahmanna pawimawh engemawzat an siam nghal a ni.
DM&R Minister Prof. Lalnilawma chuan tunhnai ruahsurin Aizawl khawpui mai bakah Mizoram hmun hrang hranga chhiatna a thlen chu pawi a tih thu a sawi a, harsatna tawktu chhungkuate a tawrhpui thu a sawi. In sa tur leh in sa tawhte pawhin tuichhia leh thli paihna tuihawk luankawr tha tak siam a pawimawh thu a sawi a, sawrkarin in satute zawm tur dan a siam chu tha taka kan zawm a pawimawh a ni tiin, vawiina Aizawl khawpui chhunga lei chet nasatna hmun hrang hrang ami an tlawhte chu sawrkarin Joint Inspection Team endik turin ruahmanna an siam thu leh vawiin ni la la hian an chet chhuah nghal thu sawiin, an report pawh a rang thei ang bera thehlut tura an inhrilh thu sawiin, sawrkarin theihtawp chhuaha bawhzui nghal a tum thu a sawi bawk.
Minister Pu C. Lalsawivunga pawhin ruahtui lo dawnsawn kawngah fimkhur a tul thu leh tuihawk luan kawr mumal tak neih theuh a pawimawhzia sawiin, bawlhhlawh a bik takin tawihtheilo paih kawngah kan fimkhur a ngai lehzual hle a ni, a ti.
Minister te hi DM&R Secy, DC & his officials, Geology & Mining, PWD, PHE, P&E, AMC, UD&PA, DIPR official te’n an tawiawm a, an kalna hmun apiangah bialtu MLA, Corporator, Local Council hruaituten an lo dawngsawng a ni.
