Aizawl khawpuiah Dengue vei an tam

Tunlai a Mizoramah Dengue natna a leng mekah August thla chhung khan he hri kai hi mi 84 an awm.
Health department a Joint Director (Malaria) Dr. Hmingthanmawii sawi danin, kumin January atanga August thla tawp thleng khan Mizoramah Dengue hri kai leh kai lo mi 1,330 endik zingah mi 135 chuan an kai tih hmuhchhuah a ni a. Aizawl khawpui chhungah phei chuan a hri kai an tam hle a, Aizawl district-a Dengue hri kai hi mi 106 an ni. Lunglei district-ah Dengue natna vei 12 an awm a, Champhai district-ah 7 an awm bawk. Mizorama leng hi a hlauhawm loh zawk leh a veite’n an tawrh nat loh zawk a nih avangin tun thlengin Dengue vanga nunna chan an la awm loh thu Dr. Hmingthanmawii chuan a sawi bawk.
Dengue vei leh vei lo endikna atana an hman pakhat Rapid Test hi sorkar laipui-in a pawm loh avangin Elisa khawl hmanga hmuhchhuah chauh pawm a ni a. Aizawl-ah mimal enkawl damdawiin leh laboratory thenkhatah elisa khawl hi a awm a, sorkar enkawl-ah chuan Civil Hospital leh ZMC-ah chauh a awm thung a, Lunglei Civil Hospital tih loh district dang sorkar enkawl damdawiinah dah ve a ni lo ni a thudawn a ni.
Mizoramah hian kum 2013 khan dengue vei 7 hmuhchhuah a ni a. Heta tang hian kumtin he hri vei hi an awm ziah a. Kum 2016 khan tam berin mi 580-in an vei a, kum 2017-ah mi 136 in vein kum 2019 khan mi 131-in an vei bawk a ni.