Kum 1950 hmalama Aizawla inbengbel tawh ten pawl an din, Aizawl Mihlun Thlahte hmalakna a din thar leh Aizawl hmunhlu leh landmark pawimawh tak Upper Khatla a Sabinga Lung chu Aizawl Mayor Pu Lalrinenga Sailo chuan vawiin hian Aizawl mipuite tan hlanin; a hawng. Pu Lalrinenga Sailo chuan Aizawl Mihlun Thlahte rawt ang in; kum thar atangin Aizawl Day chu Aizawl mipui zawng zawng huapin; ropui taka hman tan a ni dawn tih sawiin; hemi atan hian budget ah nuai 50 dah anih thu a puang.
Aizawl Mayor chuan Aizawl Mihlun Thlahte chuan tunhma atangin sorkarah chhiah an chawi thin tih sawiin; lawm takin an lo pe tawh thin a. Tuna Aizawl Municipal Corporation in chhiah a tihpun chu a punna a tlem hle tih sawiin; khua leh tui tha te chuan chhiah tha takin i pe thin ang u tiin kalkhawmte a sawm. A sawi zelna ah Pu Lalrinenga Sailo chuan Aizawl Mihlun Thlahte chu a nungchang a mawi a, a hriat thu leh Aizawl mipui nuai 4 dawl zo tura an rilru puthmang zau leh fel tak chu mipui ten tawiawm that a tul thu a sawi. Aizawl Khatla Venga Naik Sabinga Lungphun din thar leh hi kum 1935 a British in min awp lai ata tawh ding niin; chuta tang chuan Aizawl landmark pawimawh tak a ni chho ta zel a ni. Naik Sabinga hi 2nd Assam Rifles mi leh sa anih angin 2nd AR hotute pawhin pangpar an dah. Aizawl Mihlun Thlahte hi kum 2017 atanga din niin; tunah hian member 500 an ni mek a. Aizawl hmunhlu chei that kawngah hma lak chhoh zel an tum a, kumtinin Krismas luanchhuahna an nei thin bawk. An pawl rorelna sang ber High Council chu November ni 23 hian Synod Conference Center ah an nei ang.
