Kum 1950 hmalama Aizawla inbengbel tawh, an tu leh faten Pu V. Thanga In, Dawrpuia an din, Aizawl Mihlun Thlahte chuan Aijal Club ah Inkhawmpui Lian HIGH COUNCIL an kova. Environment, Forests & Climate Change Minister Pu Lalthansanga chuan khuallian niin a hmanpui. Minister Pu Lalthansanga chuan Aizawl mite chu Mizoram darthlalang an nih avangin; chetze kawngah leh thil tih engkima hmahruaitu ni zel turin a chah a, Aizawl khawpui hmasawn nan leh thanzelna atan ngaihtuahna seng zel turin a chah a. Aizawl mihlun thlahte mizia leh nunphunga bet tlawmngaihna, duham lohna leh kut tling loa sum lakluhna laka fihlimna te chu midangte tan pawha entawn tlak niin a sawi.
Aizawl Mihlun Thlahte High Council hi an Vice Chairman Pu John Rotluangliana chuan a kaihruai a, an Chairman Pu K. Liantlinga chuan Presidential Address pe in, an General Secretary Tv. Mathara leh Treasurer Dr. Vanlalruata ten pawl hmalakna chanchin an sawi. Aizawl Mihlun Thlahte pawl ah hian member 1,200 an inziaklut mek a, Aizawl hmasawn nan leh tanpui ngaite tanpuiin hma an la fo thin.
Aizawl Mihlun Thlahte HIGH COUNCIL hian resolution siamin; Assam Rifles ten an ram chhuahsan turah hian mimal leh pawl hmingin ram tumah pek loh nise. Aizawl mipuite tana tangkai thei ang ber tura hman ni rawh se tih resolution an pass. Aizawl Mihlun Thlahte HIGH COUNCIL hian an pawl chu Aizawl thatna leh hmasawnna duh an nih avang leh pressure group an nih loh avangin; Pawl 3 te telna – Aizawl Mihlun Thlahte, INTACH Mizoram Chapter leh Aizawl Hmathlir Pawl te thawhhona Joint Working Committee atangin inhnuhdawh an rel.
Kum 2024 – 2026 chhunga pawl hruaitu thlan te :
1. Dr. Vanlalruata, Bungkawn
2. John Rotluangliana, Dawrpui
3. K. Liantlinga, Venghlui
4. K. Vanlalnghaka, Dam Veng
5. R. Lalsangluaia, Kulikawn
6. V. Lalnunthara, Dawrpui
