Aizawl North II Bialtu MLA, Dr. Vanlalthlana chuan vawiin khan Govt. Aizawl North College hnenah college library-a dah tur lehkhabu thahnem tak a hlan a. Heng lehkhabute hi Mizo lehkhabu rotling leh dahthat atana pawimawh bika ngaih 200 leh UPSC Exam atana inbuatsaihna puitu tur lehkhabu 100 vel a ni a, hemi hmang hian college library-ah Mizo Literature Section leh UPSC Exam Section siam a ni dawn a ni.
Dr. Vanlalthlana chuan, “Mizoram chhuak lehkhabute hi keimahni bak ngaihlutu tur kan awm lo a, lehkhabu ziak lamah kan kal ve thei lo a nih pawhin a lei leh chhiar lamah tan la turin ka ngen a che u. Ziak leh chhiar kan tam ang hua state pawn lamah kan ropui loh chhan hi zirna kan kalpui dan dik tawk loh vang a ni lian hle a, zirna hmanga Zoram mipuite leh thangthar lo awm zel turte kawng thaa kan hruai hi a pawimawh takzet a ni,” a ti.
Aizawl North-II MLA Dr. Vanlalthlana hian kum hmasa lamah pawh MLA fund atangin Govt. Aizawl North College tan lehkhabu leina a lo pek tawh bakah zirlai khawsak harsate tan admission fee a lo tum sak tawh bawk. College zirtirtute leh zirlaite chuan Bialtu MLA chungah lawmthu an sawi a ni.