Aizawl S-I-ah voter 485 MNF Party-ah lawmlut

Bethlehem Vengthlang YMA Hall-ah vawiin khan MNF, Aizawl South-I Block huaihawtin ‘Mi thar lawmluhna hun’ hman a ni a. He huna khuallian MNF Adviser Robert Romawia Royte, Minister ni bawk chuan South I huam chhung veng hrang hrang atangin Congress, ZPM leh Neutral atangin voter 485 a lawmlut.
Mi thar lawmluttu Robert Romawia Royte chuan MNF chu party hlun ber anih thusawiin kum 60-na lawm mek thu te, MNF-ah a luh hma khan party hrang hrangten nihna hrawl tak taka an thlem thu leh, MNF zawm chu an chhungkaw tawngtai chhanna anih thu a sawi a. Vawiina member thar 485 lai lawmlut theia an awm chu Pathian hruaina a ni, a ti. Membership fee pea ‘Pathian leh kan ram tan’ titute chu an ngheh bikzia sawiin vawiina lut tharte tihfuh thu leh MNF lo chu party dang belh tur an awm loh thu a sawi a ni.
“Covid avangin sum kan dawn tur cheng vaibelchhe tam tak kan dawng thei lo a. Chutihlaiin, SEDP chu rethei leh harsa zawkte tan a inkhai fuh chho mek a. ‘An ti thei lo ang’ tiin thenkhatin sawi thin mahse; kan ti thei zel a. Hmana hun harsa tak kara MNF hruaichhuak thintu Pathian khan tun thlengin min la khaichhuak zel a ni. Tunah hian SEDP chu mi tam tak account-ah a lut tan dawn mek a, tuna la thlan ve lohte pawh mi tam tak kum tharah thlan an ni ang,” Pu Robert Romawia Royte chuan a ti.
Robert Romawia Royte chuan Pu Lalduhoma leh amah an inan loh thu sawiin, “Pu Duhoma chuan thlarau a lawmlut thin a, keini chuan a tak tak kan lawmlut a ni. Pu Lalduhoma’n Rajiv Nagar-ah September ni 2 khan mi thar 40 chuang a lawmlut a. September ni 5-a VC bye-election ah chuan ZPM candidate khan vote 6 chiah a hmu lawi si a ni. Keini chuan vawiinah pawh a tak ngei kan lawmlut a ni. Tun tum VC bye-election-ah hian seat 65-ah inthlan a ni a, MNF-in 33 kan la a, a bak chu party dang zawng leh independent-ten an insem ve mai chauh a, MNF kan che tha hle a ni,” a ti bawk.
Minister Robert Romawia Royte chuan hmasawnna hna thawk tam leh tam lo hre duh chuan Taxation website-ah lut mai se, an hriatchhian tur thu a sawi a. MNF term reilote chhung hian GST a tam thu sawiin, GST a lo luh tam chuan hmasawnna hnathawh a tam a ni a ti a. Congress kum tam tak sorkar lai ai khan tunah hian GST a loluh tam thu a sawi.
He hunah hian MNF Treasurer K.Vanlalauva chuan MNF chu Hnam movement-a a din tirh ata tun thlengin leader tha kan nei reng a, kan vannei hle a ni. Hnam movement reng rengah leader tha an neih loh chuan an ding chhuak thei ngaillo, a ti.
R.Lalhnuna PAC MNF Gen.Hqrs.pawhin thusawiin, Aizawl South-I hi opposition-ah kan awm tawh dawn lo a, South I thar kan din ang. Inthlan hrang hrangah hnehna chang zelin MLA 28 kan nei mek a. Politics-ah hian dawihzep an ding chhuak ngai lova, huaisen a piang an ding chhuak a, nakum inthlanah kan hotuten he lai bialah hian tupawh candidate-ah rawn dah se, kan titling ngei ngei dawn a ni, a ti.