Nimin 2nd December, 2022 zan dar 8:00 khan Ignite Studio Khatla-ah, Aizawl Smart City Ltd. MZP Inter High School Quiz 2022 kharna hun leh final match neih a ni a. He hun hi Dr. R. Lalthanliana Minister chuan khuallian niin a hmanpui. Quiz-ah hian a pumpuiah St. Paul’s Higher Secondary School chu pakhatna an ni.
Quiz kharna hunah hian khuallian Dr. R. Lalthangliana Minister chuan thu sawiin, “Mizote hian fakawmna leh thatna tam tak kan neih rualin tan lakna tur tam tak kan nei a ni” a ti a. “Kan khawvel hi a thawkrim leh taima, mi vantlang chunglam te tan lo chuan a harsa em em a. Kan khawvel hi a ti mai mai tan hlawhtlin a har em em tawh. Chuvângin, tih tak takna nen, a nawlpui aia sang nih in tum loh chuan hlawhtlinna a awm lo” a ti.
Khuallian chuan, Zirlaite hian mi tih theih ang an ti ve thei a ni tih ngaihtuahna huaisen an put loh chuan, Competitive khawvelah an hniam zel ang a ti bawk.
Pu Lalnunmawia Pautu MZP President pawhin thu sawiin, “MZP in Inter High School Quiz hi 2010 atang khan kum tin kan lo buatsaih thin a, heta rawn tel ngam zirlai leh a thiam bikte phei chu Matric Exam result-ah pawh a titha ber berte an ni fo thin” a ti a. Mizo zirlaite Social Media khawvelah thudik lo post leh thehdarh kawngah fimkhur turin leh mahni zirlai dah hmasa turin a fuih bawk.
MZP Inter High School Quiz hi MZP chuan kum 2010 atang khan kum tin a buatsaih thin a. MZP Inter High School Quiz 2022 hi Aizawl Smart City Ltd. ten an Sponsor a ni.
A pumpuiah hian sikul 15 an tel a, chuta a titha sikul pathum ten nizanah intihsiakna an hmachhawn, St. Paul’s Higher Secondary School chu pakhatna a ni a. St. Joseph Higher Secondary School chu pahnihna niin, Kids Care School chu pathumna a ni. Pakhatna St. Paul’s Higher Secondary School aiawha telte chu, Malsawmsangi Hmar leh T. Lalmuanpuia te an ni.
Pakhatna hian, lawmman Rs. 30000/-, Trophy, thuziak leh lehkhabu hrang hrang an dawng a. Pahnihna hian lawmman Rs. 20000/-, Trophy, thuziak leh lehkhabu hrang hrang an dawng a. Pathumna hian Rs. 10000, Trophy, thuziak leh lehkhabu ṭhahnem tak an dawng bawk.
MZP chuan, quiz neih a nih theih nana phal taka Sponsor-tu zawng zawngte chungah lawmthu a sawi tak meuh meuh a ni.
