Aizawl Sustainable Urban Transport Project (ASUTP) chungchang ah nikhat awh Workshop chu ni 10.11.2022 hian RB McCabe Hall, Aijal Club, Khatla, Aizawl ah Asian Development Bank (ADB), Project Planning, Development and Management Consultant (PPDMC)-Mott MacDonald Pvt.Ltd., leh UD & PA Deptt. te buatsaihin neih a ni. He Workshop thupui hi ‘Sustainable Urban Transport Scenarios for Aizawl’ tih a ni. He project hi UD&PA Department hnuaiah ADB puihna in Project Management Unit (PMU) in a enkawl a ni.
He Project hnuaiah hian Aizawl leh a chhehvel tan Comprehensive Mobility Plan (CMP) chu PPDMC hian a buatsaih mek a ni. He CMP hian a turn ber chu tun atanga kum 20 chhung atan Aizawl khawpui than dan mil a mipui chetvel awlsamna tur ruahmanna siam a ni.
Inaugural Function hi Pu H. Lianzela, Director, UD&PA Department & Addl. Project Director, PMU-ASUTP chuan a kaihruai a, Workshop a lo tel te lawmna thu sawiin, Workshop programme tlangpui leh Workshop in a turn ber chu data hrang hrang hmangin hmalam hun atana mamawh siam a nih thu a sawi a. ASUTP chu ADB in Urban Transport Project a kal pui hmasak ber a nih thu leh, he project hlawhtlin dan a zirin khawpui dangah pawh ADB in Urban Transport Project a kal pui theih dan turte a sawi a ni. Pu Manish Rege, Team Leader, PPDMC in Project Planning, Development and Management Consultant (PPDMC) ASUTP kal phung tlangpui leh Project kal pui a nih dan leh an hmalak tawh dan te tawi fel takin a sawi. Pu Lalmalsawma Pachuau, Secretary, UD&PA Deptt. & Project Director, PMU-ASUTP chuan Workshop hawnna neiin, ASUTP chu tih hlawhtlin a nih huna Aizawl khawpui tan a that dan tur leh mipui tan pawh chet vel a awlsam phah ngei a rin thu a sawi a. PM Devine Scheme hnuaia Aizawl By Pass Road pawh sawi long in, ASUTP a hlawhtlin ngei theih nan Department tinte mawhphurhna sawiin, Workshop ah hian ngaihdan leh rawtna an neih te chu inthlahrung lo a sawi turin a sawm a ni. Hemi hnu hian Chairman in lawmthu sawiin session khatna chu tih tawp a ni.
Session hnihna hi Pu Chuauhnuna, Deputy Secretary, UD & PA Deptt. & Project Manager, PMU-ASUTP in kaihruaiin, Pi Nimisha Pal, Deputy Team Leader, PPDMC chuan Comprehensive Mobility Plan (CMP) in a huam chin (area) leh an zirchian dan te, khawpui than dan, kan nitin nunphung leh Sustainable Urban Transport chungchang te sawiin, Pu Girish Kumar Badifanka, Senior Traffic Modeller, PPDMC in Transport Model in hna a thawh dan leh Aizawl ah engtianga hman fur nge a nih tih bakah, transport model nih phung te sawi fiahin, kan hman tangkai theih dan turte fiah takin online in a sawi bawk a ni. Hemi hnu hian Chairman in lawmthu sawiin session hnihna chu tih tawp a ni.
Session thumna chu Anbuchezhiyan Sundaram, Urban Transport Specialist, ADB in kaihruaiin workshop a tel tura sawm te leh PPDMC a mithiam te nen sawihona hun atan hman a ni. He sawihona ah hian Aizawl tana hmathlir te, ASUTP hnathawh fur atana chona awm thei sutkian dan tur te, Stakeholders Department te, in he project a an mawhphurhna leh harsatna leh a chinfel theih dan kawng awmte sawiho a ni. Hemi hnu hian Pu Manish Rege, Team Leader, PPDMC in workshop a thusawi leh zirho tlangpuite khaikhawmna neiin, project kal pui zel dan turte leh ruahmanna an neih te a sawi a, Pu Andrew Lalhruaia, Deputy Director (Plan), UD&PA Deptt. & Coordinator, PMU-ASUTP in lawmthu sawiin session thumna hi khar a ni
