Aizawl, April 7 : Pu C.Lalruaia, MPS, Superintendent of Police, Aizawl District chuan tunhnaiah Aizawl khawpuiah dan bawhchhiatna/pawikhawihna kum dang aia a hluar thu leh chung zingah chuan rukruk case a tam fal hle thu vawiin khan thuthar thehdarhtute hmaah a sawi a, mi thil ruk lo leichhawngtute hi a rutute ang bawka dan hnuaia hrem theih an nih avangin mipuite chu fimkhur tura ngenin, rinhlelh thil a awm a nih chuan police te hnena report thin turin a ngen bawk a, IPC section 411 in a sawi angin a man pangngai aia tlawm uchuak te, a neitu tak hmel pu lo mi rinhlelhawm deuh hnen atanga lo lei te hi kan umzui zel dawn a ni a ti a. Mipuite hnena zirtirna pek kawngah nasa lehzuala tan lakpui turin kalkhawmte a sawm nghal bawk a ni.
January 1, 2022 atanga March 31, 2022 chhungin Aizawl khawpui chhunga Police station 4 ah case 572 register tawh a nih thu sawiin heng zinga case 397 (69.64%) hi rukruk case a ni, a ti.
SI.
No
POLICE
STATION
Total no of
Case registered in 2022 till 31.03.22
No of Property Theft Cases registered in 2022 till 31.03.22
Percentage out of total cases
registered in 2022 till 31.03.22
1
Aizawl
214
160
74.77%
2
Bawngkawn
234
164
70.69%
3
Vaivakawn
97
51
52.05%
4
Kulikawn
27
22
81.06%
Total
572
397
69.64%
Pu C. Lalruaia chuan rukruk chungchang bikah thil bo zinga langsar zualte chu Mobile phone, lirthei (two wheeler), lirthei battery, tui pipe, fire hydrant coupling, water meter, thawmhnaw leh mobile phone tower nuts bolts leh a part dang te an ni, a ti a. An zirchianna a Ian danin heng thil bo te hi awlsam taka hralh chhawn leh mai theih thil an ni hlawm a, hralh chhawn leh awlsam an nih vanga rukbo nasat an nih ngei a rinawm a ti.
Mobile phone bikah original box nei lo, screen lock/password pawh hre lo, charger leh accessories dang pawh nei chuang lote pawh lei duh kan awm zel hi a vanduaithlak hle a, ti tawh lo turin kan inngen a ni, a ti a. Mobile Phone repair shop neite pawh hetiang rinhlelhawm deuhte chu a lock lo thiah sak lo tur leh chutiang mi in an rawn dawr a nih chuan an awmna bialtu Police station hnena report zel turin a chah a ni.
Thirchhia anga hralh mai theih heng-PHE pipe, vehicle battery, fire hydrant coupling, copper wire, water meter, mobile phone tower nuts/blots leh parts dangte a bo nasa hle bawk tih a sawi a, thirchhe dawr neitu te pawh hetiang thil hi lo lei lo tur leh hetiang rawn zuar an awm a nih chuan an awmna bialtu Police station hnena report zel turin a chah nghal bawk a ni.
Lirthei, a bik takin Two wheeler bo a tam hle bawk tih sawiin, thenkhatte chu ruk bo tak tak ni lem lo, zan lama leng haw kea kal peih loh vanga kawngsir vala mi ta lo khalh ve ngawt te an ni a, ni 2/3 hnua kawngsira hmuh leh mai te a awm thin, a ti a. Chutiang ni lo, a ru tak takte hi chuan a steering lock an phelh hnuah an direct a, an hman emaw hralh leh dawnin ignition system (chahbia tihnunna) thar emaw modify an mamawh ngei ngei a ni,a ti a. Automobile Spare parts dawr leh workshop neitu te chu hetiang ignition system mamawhte hnenah an hralhchhuah dawn emaw an siam dawnin document felfai tak a nei ngei em tih lo chian hmasa turin a chah a, mipuite pawh lirthei second hand an lei dawnin document felfai tak phut turin a chah bawk a ni.
Rukbo zinga hluar tak Gas cylinder hi sorkar hnuaia Agent te kaltlang lo chuan engti kawng maha lei theih loh thil a ni tih mipuiten hria se a duh thu sawiin, lei lo ngam turin a chah a, lo zuar an awm chuan Police Station hnai ber ah report thin turin a ngen nghal bawk a ni.
Aizawl SP chuan thil rinhlelhawm tih hriat ngawih ngawih, a man pangngai nena inthlau lutuk te, a zuartu hmel en reng renga rinhlelhawm, a ken tel tur document pawh nei mumal lote chu IPC Section 411 in a sawi anga man tel zel an ni tawh tur thu a sawi a, a hremna hi kum 3 thleng tan emaw pawisa chawi theih, Bail theih loh (non-bailable) a ni, a ti a. Hetiang laka kan buai loh nan mipuite fimkhur turin kan inchah mawlh mawlh a ni, a ti.
Rukruk venna leh rukru te manchhuah kawngah mipuite thawhpuina Police ten an mamawh hle tih a sawi a, tunlai hian mahni-a (private) CCTV nei engemawzat kan awm tawh a, hei hian hnuchhuina kawngah vawi tam tak min tanpui tawh a. CCTV hi a nei thei apiangin uar lehzuala neih tum turin mipuite kan ngen a ni, a ti a. Rukru te man chhuah kawngah mimal leh veng tina NGOs te thawhpui atan a sawm a, a hnuaia Police stations phone no tarlan te hi lo chhinchhiahsak a, rinhlelhawm deuh kan hmu anih chuan Police hrilh hre vat turin ngen a ni.
Aizawl Police Station – 0389-2322375/8794747291
Bawngkawn Police Station – 0389-2340758/8794747292
Vaivakawn Police Station – 0389-2432303/8794747293
Kulikawn Police Station – 0389-2322379/8794747294
Zonuam Out-Post – 0389-2341463/8794747295
Mobile number tarlanah te hian (Zawlnuam Outpost tih loh) whatsapp hmangin thlalak pawh a thawn theih vek tih tarlan a ni.
Aizawl SP chuan Emergency Response Support System (ERSS)-112 hi darkar 24 chhung biak pawh theihin an awm a, harsatna leh information pawimawh engpawh nei chuan a biak theih a, anni hian a changtu Police Station hnenah an lo hrilh chhawng leh zel dawn a ni,a ti a. rilrum leh damlohna thila ambulance etc. mamawh a nih pawhin he emergency number biak pawh hian ruahmanna an lo siam thei tih sawiin, tangkai taka hman theuh tum turin mipuite a chah a ni.
