India leh South Korea in thianthat kum 50na denchhena buatsaih All India Inter SAI Taekwondo Championship, New Delhi, February 24 – 26, 2023 chhunga neih ah Mizo ten Gold 2, Silver 2 leh Bronze 3 an la.
Gold Medal pahnih hi Ramdingliani lak ve ve niin Kyorugi inelnaah leh Poomsae inelnaa a la lak a ni a. Kyorugi-ah Under 45kg a khelin a Khelh khatna hi a bye a, a khelh hnihnaah NCOE Trivandrum naupang nen an in tumin round hnihnaah a Knock Out a. Semi Finalah STC Kargil player pawh round hnihnaah bawk a knock Out leh a ni. Finalah hian India rama Taekwondo zirna hmun tha bera chhal ngam, NOEC Lucknow Naupang nen an intum a, Rami hian inhneh tawk tak chungin 5-6, 6-13 a round lain a champion pui ta a ni. Tin, Rami hian Poomse inelna Junior category ah a khel leh a, Gold a la leh bawk a ni.
Chanmari West nula Ramdingliani hi Mizoram Amateur Taekwondo Association-in Olympic Vision Player a neih zinga pakhat niin nikum kum tawp khan zirna tha zawk nei turin Bangalore SAI Centre-ah nikum khan dah a ni a, a kalna senso zawng zawng pawh Mizoram Olympic Association(MOA) President & Sports Minister zahawm tak Pu Robert-a hian tum sak nghe nghe a ni. Gold medal a lak avangin hian Korean Sawrkar tum sakin Korea ramah training turin a kal zui ang.
Tin, Poomsae Inelnaah hian Venhlui tlangval Lalthlamuanpuian Senior Under 30 category-ah Silver a la bawk a. 1st round hi cut off system hmangin a thiam 16 an thlang chhuak a. Quarter final atangin Knock out system an hmang a. Puia hian Quarter finalah Punjab tumin a hneh a, Semi finalah Delhi tum lehin a hneh leh a, Finalah hian Services(SSCB) nen in tumin Puian 7.30 a score laiin SSCB hian 7.36 a score avangin Silver a la ta a ni.
Category dangah Stella Lalmuanpuii, Armed Veng South tuna Aizawl SAI a awm mek chuan Silver medal a la bawk a. Silver medal dawng tur hian Finalah hian Kohrajar SAI naupang nen in tumin 4-6, 6-3, 3-2 a inhneh tawk taka an inkhelh hnuah a vanduai zawkah tangin Silver a ta a ni. Inkhel dangah Marcus Vanlalruatpuia Ramthar veng, Lunglei chuan under 49kg Semi finalah NEOC Bangalore lakah 3-2, 5-2 a chak lovin Bronze medal a la a, Hmingchhuanmawia Lawngtlai pawhin under 49kg Semi Final vekah ABSC Nasik lakah 6-2, 3-1 a chak lovin Bronze medal a la bawk. Tin, Stephen Lalhminghlua Khawzawl pawhin Semi Finalah bawk NCOE Bangalore tumin 1-0, 1-3, 2-0 a hneh lovin Bronze medal a dawng bawk.
Mizoram Team hi SAI Coach Gade Veerabasavaia in a hruai a ni.
Kyorugi Medallist
1. Ramdingliani, Chanmari W/NEOC Bangalore Under 49 kg, Gold Medal
2. Stella Lalmuanpuii, Armed Veng S/SAI (A) Over 63 kg, Silver Medal
3. Hmingchhuanmawia, Lawngtlai/SAI(L) Under 49 kg Bronze Medal
4. Marcus Vanlalruatpuia, Ramthar/SAI(L) Under 49 kg Bronze Medal
5. Stephen Lalhminghlua, Khawzawl/SAI(A) Over 73kg, Bronze Medal
Poomsae Medallist
1. Ramdingliani, Chanmari W/NEOC Bangalore Junior Individual, Gold Medal
2. Lalthlamuanpuia, Venghlui/Gidae TC Senior Individual, Silver Medal
Coach – G.Veerabasavaiah, SAI
