Aizawl Municipal Corporation chuan vawiin khan Miss Grand India 2025-a 1st Runner Up Vanlalnuntluangi, Thuampui Veng lawmpuina leh chawimawina hun AMC Auditorium, Thuampui-ah a hmang a, AMC hian Ambassador atan sawm nghalin Miss Vanlalnuntluangi hian AMC sawmna hi a pawm nghal bawk a ni.
Aizawl Mayor Lalrinenga Sailo chuan AMC hminga lawmpuina thuziak leh sum fai Rs 100,000 (nuai khat) hlanin Aizawl-in India ram inelna sang taka 1st Runner Up ni thei kan nei chu chhuanawm a tih thu a sawi a. Mizoram mai ni loin, Aizawl khawpui leh AMC Office awmna Thuampui Veng timawitu leh tihmingthatu hi chawimawi a phu hle a, kohhran leh khawtlang tana a hnathawhte hi thalaite tan entawn tlak tia fakin Aizawl ti hmingthatu ni chhunzawm zel turin duhsakna a hlan bawk a. AMC Ambassador a nihna anga Aizawl khawpui hmasawnna tura hmalakna kawng hrang hrangah leh faina kawnga AMC puibawm zel tur leh Aizawl mipui te, thalai te leh naupang zawk te kawngdik kawhhmuhtu ni turin a chah a ni.
Miss Vanlalnuntluangi chuan AMC in Ambassador tura an ruatna a pawm thu sawiin, khawtlang rawngbawltu a ni a, khawtlang ta a ni tih sawifiahin AMC nena thawk ho a, Ambassador nih chu a tihmakmawh a nih thu a sawi a ni.
Lawmpuina hun hman zawhah Miss Vanlalnuntluangi, Miss Grand India 2025, 1st Runner Up hian, Thuampui Local Council leh Republic Veng Local Council huamchhunga bawlhhlawh tawih thei khawnna tura ruahman Garbage Truck a Flag Off nghal bawk.
Miss Grand India 2025, 1st Runner Up lawmpuina leh chawimawina hun hi Joseph H. Lalramsanga, Municipal Commissioner in a kai hruai a, he hunah hian Executive Corporators, Corporators, AMC Officer & staff te leh Thuampui Veng Local Council leh NGOs ten an telpui a. Vanlalneia, Thuampui Veng bialtu Corporator in lawmthu sawiin programme hi a khar a ni.
