AMC huam chhunga ZPM Party Candidate te chuan vawiin khan Aizawl Press Club-ah chanchinthar lakhawmtute kawmin, “ZPM a sorkar chuan awmze nei zawka sorkar kalpui a nih bakah mahni kea dingchhuak duhte dawm kan an nih dawn avangin state mipui ten nasa takin hma kan sawn dawn a. Mizoram mipuite, ZPM party lo support theuh turin kan ngen vek che u a. ZPM party in Sustainable Development and Reform Policy (SDRP) hmang hian state intodelh, corruption nekchepna leh mi taimate dinchhuahna ram kan siam thei a ni,” an ti.
“Mizoram hi Hydro Electric Power siam chhuah theihna nei sang tak kan ni a. 4,000 MW vel siam chhuak thei kan nih laiin August, 2023 a Assembly Session zawhna chhanna atanga kan hmuh chu kan mamawh 7% chauh kan lo la siam chhuak thei chauh mai a. Hydel Project kan neih ho lah kan enkawl theih loh avangin company kutah kan dah a ngai ta hial a. Bairabi HP 80 MW siam theihna a zuzi ta te, Tuirial HP 60 MW siam theihna to taka kan lei tak dan te leh Tuivai HP, 210 MW siam chhuah theihna zuzi leh lek lekte hi keini ZPM party chuan a hriat hrehawm kan ti a. Power-a kan intodelh ve theihna tur, Ministry of Finance in Viability Gap Funding hmanga Rs.1,700 Cr senna tur Tuivai Hydel Project, 210 MW atana ‘In-Principle Approval’ a pek tawh chu a buaipuitu turin a ngaihsak loh leh hun pek belh a dil loh avanga an phalna hnuh kir a nih chhan hi MNF party hian mipui hmaah, thil kal dik tak sawiin, insawifiah turin kan phut a ni.
“Power Bill a pek loh avanga state dangin power min cut sak tura vauna kan tawk fo mai hi hrehawm kan ti tak zet a. Mizoram budget sum tam tak eizotu, Power kan leina hi kan tihtlem theih chuan nasa takin kan sum indaihlohna a tiziawm thei dawn a. ZPM party a sorkar chuan, Power-a kan intodelh theih dan tur buaipui hi kan ngaih pawimawh hmasak berte zingah kan dah a ni,” an ti bawk.
“Dr. Vanlalthlana’n ‘The Private Transport Workers (Welfare) Bill, 2022’ a put luh atang khan keini ZPM party chuan lirthei eizawngte khaikan kawngah nasa taka hma lak kan tum tih a chiang a. He bill ngaihtuah a nih laia, kan CM lehzelin lirthei eizawngte diriamna tawngkam an hmang kha pawi kan ti hle a.
“Lirtheia eizawngte hi accident tawk thut thei dinhmuna awm, chhungte chhuahsan ngai reng leh lirthei khu kara eizawng an nih avangin ngaihsak an ngai kan ti a. ‘Labour Cess’ hmanga hamthatna an dawn ve theih loh avangin lirthei eizawngte hamthatna tura sum mamawh chu VAT on POL (Petrol – 25%; Diesel – 14.5%) atanga ngaihtuah sak theih a ni a, Consolidated Fund atang pawhin a pek theih a ni. Lirtheia eizawngte harsatna chi hrang hrang – pollution test, permit replacement, bus terminal, special road permit leh thil dangte pawh Association hruaitute nena inberemin chinfel dan ngaihtuah sak a ni ang.
“Mizoram-a chengte hi kan thatchhe hran lo va, taimakin awmzia a neih thin loh avangin hmalak ngaihna kan hre lo mai a ni. ZPM chuan Bana Kaih (Hand Holding) Policy hmangin din chhuah duhte chu a tanpui dawn a. Bana kaih policy hi industry, agriculture, horticulture, sericulture, handloom & handicrafts, services sector leh thil siamna dangah hman a ni ang. He policy hmang hian thil thar chuaktu/siam chhuaktu/ thiam thil hmanga eizawngte (farmers, producers & entrepreneurs) leh Market thlun zawm dan tur nasa taka ngaihven a ni ang a. Bana kan kaih turte hi kan tichak (capacity building) phawt ang a, market nena kan thlunzawm hunah chuan anmahniin an kal thei tawh ang. Vai sumdawngte nena an insumdawn tawn dawnah an contract/inremna kan enpui dawn a, buma an awh lohna atana tih a ni. Sum lama harsatna an tawh thin kha sutklian dan tur ngaihtuah an ni ang a. Sorkarin subsidized rate leh loan pung awm mang lo te pawhin a pui zui ang a. Sum tam tham an mamawha loan an lak duh pawhin an tan sorkar chu guarantor-ah a tang ang. ZPM party kan sorkar chuan Bana Kaih Policy avang hian Kuthnathawhtute leh Entrepreneurs te tan kawl a eng ve tawh ang a. Intodelhna lamtluang kan zawh tan tawh ang,” an ti bawk.
