AMC-in mipuite tan Complaint Box a hawng

Aizawl Municipal Corporation hnuaiah Enforcement Committee chu Municipalities Act 2007 (as amended in 2019) in a phal angin, Board of Councillors Meeting dt. 10 & 11 March 2022 in a din a. Nimin khan an Chairman John Zosangliana Ralte kaihhruaiin meeting an nei a. Meeting neih zawh hian, mi tupawhin AMC thuneihna hnuaiah complain an neih reng reng an complaint-na an thehluhna tur AMC Office ground Floor-ah ‘Complaint Box’ chu a hawng nghal a. He Complaint Box-a lehkha lutte chu kartin Zirtawpniah hawn a, bawhzui ngai ang angte bawhzui nghal thin a nih dawn thu a sawi.
He committee-ah hian Coucillors zawng zawng office luah lo chin te an awm vek a, Jt. Commmissioner hi Member Secretary a ni a, he Committee hian enkawl deuh bik tur subject chi 5 neiin, 1) Building regulation 2012. 2) Solid waste management bye laws 2019. 3) Site development and slope modification regulation 2017. 4) Licencing regulations. 5) Advertisement & Hoarding regulations te a ni.
Vawiina an hawn tak ‘Complaint Box’ hi committee hmasa ber in a ngaihtuah ani a, mi in sa zawng zawng emaw an thil tih zawng zawng an enpui theih dawn loh avangin mipui te awlsam nan complaint box siam tha an ti a, a duh apiangin he box ah hian complaint ziakin an thlen anga, ziaka lo lut chu finfiah zel an tum dawn a, complaint tu leh a chhan hi chiang taka ziak turin mipuite an ngen a, a complaint tu hi chu confidential a vawn ani ang.
Chairman John Zosangliana Ralte chuan, “Hun kal tawh chu a liam tawh a, siam that ngaihna a awm tawh lova, vawiina building permission la thar te hi kan control chuan kum 4 kan la nei a kan awmchhung reilote hian hmasawnna hmuh kan duh a, entawn tur hnutchhiah kan tum dawn ani. Office lama kan hotute Mayor leh a thawhpui te pawh hian kawng tin rengah min phur pui a, he committee hi tih chak zel pawh min tumin ka hria, he enforcement committee hi hlawhtling tur chuan Aizawl mipui ten moral support min pek angai a, kan Local council te nen tha taka kan thawhho angai bawk ang. Tin, kan technical person te leh kan building changtu engineer te pawh an hah deuha an tan deuh angai anga, dan lova che lui chu dan angin an chungah action lak ani ang, permission lak nan chauh nilo Aizawl khawpui hmel tih danglam nan he dan hi hman kan tum dawn a ni,” a ti.