Vawiin 8th August, 2024 (Thursday) hian BJP Mizoram State Office, Mipui Rûn, Upper Republic ah AMC Ward-Vl By-Election lo awm tur atana BJP Official Candidate puanna inkhawm neih niin, Pu Vanupa Zathang, IPS (Retd), State Vice President-in inkhawm a kaihruaia, Pu Vanlalhmuaka, State President-in AMC Ward-VI By-Election BJP Official Candidate atan Pu Chawnghmingthanga, BJP Aizawl District General Secretary, Zarkawt veng chu BJP Official Candidate a nih thu a puang.
Pu Vanlalhmuaka chuan, “BJP Mizoram chuan Mizoram hmasawnna turin hma kan la zel a, Aizawl khawpuiah AMC Ward-VI By-Election lo awm turah pawh Candidate ṭha tak Pu Chawnghmingthanga, Aizawl District GS chu kan nei leh ta a, Keini chuan enchhin ngai lova, min thlang a nih chuan Ward-Vl huam chhung Veng pathum (3) te tan mai bakah AMC MNF kaihhruai mek tan pawh kan Candidate hi thlan tlin a nih ngat chuan malsawmna kawng inhawnna a ni dawn a ni. BJP Official candidate hi a mihring mihrinna ah chuan a ṭha ber kan ti lova, nimahsela Development Fund haichhuah kawng ah leh Development hna thawh kawngah erawh Ward chhung mipuite tan chuan a tha ber dawn a ni tih Ward mipuite hriatah ka sawi a ni,” a ti a.
Pu Hmuaka chuan, “AMC hian Central aṭangin Budget tlemte kan dawng ṭhin a, kan sum dawnte hi AMC inenkawlna atan leh AMC hmasawnna hna thawh nan a bei tham hle a, chuvangin BJP Candidate kan thlang a nih chuan Ward-Vl mipuite kan tiam duh che u chu; Union Urban Minister Pu Manohar Lal Khattar hian AMC Ward-Vl veng pathum (3) te tana hmasawnna hna thawhna tur atan sum min pe ngei ngei dawn a, Edenthara BSUP kalkawng ṭha lo siam ṭhat na tur te, Ward-Vl Veng pathuma veng inkalpawhna kawng chhe lutuk siamna turte leh Veng chhung mamawh hrang hrang khawtlang hruaitu te’n Ward Corporator-te nen in rawn a an sawi khawm te chu BJP Candidate kan thlang tling a nih ngat chuan kan hmu dawn a ni. Pu Chawnghmingthanga hi kan thlang tling a nih chuan ka ho ngeiin Union Minister kan hmu in hma ka lakpui dawn a ni tih Ward-Vl mipuite hriatah ka sawi duh a ni,” a ti bawk.
Pu Hmuaka chuan sawi chhunzawmin, “AMC Corporator-te hian Direct-in Central ah Union Minister hi an duh hun hun ah an hmu thei lovang tih a chiang a, nimahsela BJP AMC Corporator kan nei a nih erawh chuan AMC Corporator dangte nen Central ah AMC hmasawnna tur atana kan mamawhte thlen turin kan kal anga, AMC Sorkar lai pawhin Mipuite tan Development ṭha zawk kan pe thei ngei dawn a ni,” a ti bawk.
Ward-Vl By-election lo awm tur atana BJP Official Candidate Pu Chawnghmingthanga chuan, “Ward-Vl huam chhunga Veng pathum (3) te’n Veng chhung hmasawnna atana an mamawh chu khawtlang hruaitute nen in rawn khawmin dawhkan kil hovin Ward chhung mamawhte chu kan sawi ho anga, Ward-Vl veng hrang hrang te’n kan mamawh hrang hrang tihlawhtling turin State President Pu Hmuaka kaihhruaina hnuaiah hma kan la ang a, kan beisei Development kan hmu ngei dawn a ni,” a ti.
Pu Chawnghmingthanga chuan vawiin khan Nomination a file nghal a, Nomination file na ah hian Pu Vanupa Zathang State Vice President, Pu Malsawmtluanga State General Secretary te bakah State hruaitu dang te’n an ṭawiawm bawk a ni.
