Mizoram Development Bank din, Loan pung awmlo a pek leh a thlawna sawrkar guarantor-a tan chu tihhlawhtlin mai theih a ni lo niin -Lalremruata Chhangte, General Secretary MNF Gen.Hqrs. chuan a sawi.
Vawiin ni 20.5.2024 Thawhtanni hian MNF party chuan an office Mizo Hnam Run-ah chhung inkhawm a nei a, Lalremruata Chhangte General Secretary, MNF chuan thusawiin, Tuna kan sawrkar hrawn mek ZPM manifesto ah hian thlaruk chhung in an insawi angin an awm loh thu a sawi.
Lalremruata Chhangte chuan, ZPM party hian sawrkarna an chan chuan Mizoram Development Bank an din dawn thu leh, chumi kaltlang chuan thalaite hnenah Loan pung awmlo chi an pek dawn thu te, sawrkar chu a thlawn a Guarantor-ah a tan dawn thu nasa takin an tlangau pui thu a sawi a. Sawrkarna fawng an vawn hnu ah erawh chuan, ‘Mizoram Ceiling on Government Guarantees Act’ kan lo neih avangin Loan pung awmlo a pek leh a thlawna sawrkar guarantor-a tan chu tihhlawhtlin mai theih a ni lo, tiin Mizoram mipui leh thalaite an bum leh mek hi mipui zah lohna lian tak a ni a, an in sawi ang hian awmse a duh thu a sawi.
Lalremruata Chhangte chuan ZPM in an in zawrhna thenkhat, an sawrkar chuan sawrkarin sum a puk lovang an ti a, Thla 4 chhung leka cheng vbc 1258 an puk hman te, CM in portfolio engmah achelh lo ang ti dum dum mah se, Portfolio paruk a chelh mek te, Electric bill leh bill dangte kan ti sang dawn lo an ti a, hei pawh hi an tawngkamah chuan an tihniam a, amaherawh chu atakah asang hle thung si te hi mipui zah lohna lian tak a ni. In renchem tlangau pui dum dum siin, CM adviser pawh 5 ngawt ruatin, anmahni puibawmtute thla bi hlawh ringawt pawh thla khatah cheng nuai 15 chuang niin, kum 5 chhung chuan cheng nuai 1000 dawn sen ral a ni dawn a ni, a ti a.
Lalremruata Chhangte chuan ZPM sawrkar piantirhah thiamna nei miah lo, ASI leh SI chhuichiang hmasa lo a an suspend ringawt te kha kan Police te an rintawk loh zia alang chiang hle a, police in dan mumal tak a nei a. Mimal account Instagram-ah mahni duh thu thu a, kan ram hruaitu ten action an lakna an post te khan kan police te a zah loh zia, a ti lang chiang hle in ka hria a, ASI leh SI an suspend pawh tunah chuan Dan hmaah chuan thiam an chang leh ta si a, chuvangin thil hre chiang hmasa lo a rak vak hi sim vat turin a duh thu a sawi bawk.
Lalmuanchhana Sailo, Secretary hnen atangin May ni 16, 2024 (Ningani) a ZORO Gen.Hqrs buatsaih Free Movement Regime (FMR) hlih duhlohna leh Mizoram leh Myanmar ramri hung duhlo inkhawm (peaceful rally) Zokhawthar, Tiau lui bula neih zawh tak report ngaihthlak a ni bawk.
