Mizo Students’ Union, headquarters; Chawngte executive committee meeting tahrik ni 23.5.2024 (ningani) a, MSU Office, Chawngte ‘C’ a neih chuan Kamalanagar Higher Secondary School in Education leh Economics lecturer neih loh chungchangah hma lak dan tur a rel a.
Education lecturer hi September ni 1, 2023 khan a pension a, a pension tawh hnuah sorkhar in a aiawh tur an dah mai loh avangin a mimal thahnem ngaihna in hlawh pawh phut miah lovin HSSLC exam hma zawng a thawk char char a, a chungah pawh kan lawm hle a ni. Tin, Economics lecturer hi taksa lama harsatna a neih avangin October ni 1, 2023 khan Govt. Zemabawk Higher Secondary School, Aizawl ah transfer a ni a, a aiawh dah a la nilo bawk a ni.
Education leh Economics lecturer an neih loh avang hian zirlai ten harsatna an tawk nasa em em mai a, an result pawhin a tawrh phah em em a ni. Zirlaite harsatna tawh hi MSU, headquarters; Chawngte chuan a hriatthiampui em em a, chuvang chuan tahrik ni 04.06.2024 ral hma ngeiin Education leh Economics lecturer dah turin sorkhar an ngen a, an ngennate tihhlawhtlin a nih loh chuan MBSE in school tan hun tur a a ruat tahrik ni 05.06.2024 hian Kamalanagar Higher Secondary School zirlaite chuan school tan ve loh mai nise an ti.
