Everhome Pro Volleyball Leaque 2025 @ LPS Arena, Falkland-a khelh mekah Leaque Round I result hetiang hi a ni.
May 1 (Ningani) Zan
Sihphir def Anastasia Electric Veng (mipa)
= 25-15, 25-23, 18-25, 25-21 (3-1)
Kuriz Player of the Match
= Niyas Abdul Salam (Sihphir)
REPORT
Pro Division inkhelah a vawi khat nan Sihphir an chak a, ningani zan EverHome Pro Volleyball League-ah set thum set khatin Anastasia Electric Veng an hneh.
Mizoram volleyball division sang bera an tel atanga Sihphirin harsatna an tawk a, set la miah lova khelh ruk an tlawm zawn hnuah tunhnaia an lak luh Niyas Abdul Salam leh Lalhmunmawia (Mapuia) chuan team tanpuiin, 25-15, 25-23, 18-25, 25-21-a Anastasia an hneh.
Tun season atangin Pro Division-ah Sihphir an awm a, nikum October khan Invitation Cup-ah vawi hnih inkhelin set la lovin an tlawm ve ve. March khan MVA Cup-ah tum li inkhelin set la lo bawkin an chak lo vek a, Pro Volleyball atan Kerala player Niyas la lutin a inlan hmasak berah point 23 hmuin 10 a hloh a, Kuriz Player of the Match lawman a dawng.
An chak theih nan an player thar Mapuia’n tum 10 vaw tlain vawi nga a tisual bawk a, set hmasa pahniha che tha Thangminlal Guite chuan point kua hlawh chhuakin point li a paih ve thung. Albert Zothankhuma’n point thum hlohin tum riat a hlap tla a, team danglam lantirin inkhairual takin Sihphir tan Mizo player-ten an khel.
2019 hnua Pro Volleyball-a an inlan hmasak berah Anastasia an tang tlai a, set hnih an hloh zawn hnuah beiseiawm takin nawr let mah se set thumna tawp lamah Khawbel an insiam tha a, an su tlang zo lo.
Laldensanga’n point 12 a hmuh zat chanve hlohin Lalruatsanga’n point 10 a hmuh zahve tho a paih a; set thumna atanga khel Laldinsanga’n vawi sarih vaw tlain point hnih a hloh a, Rochanpuia nen an point hmuh leh hloh a inang a, Anastasia tan Mizo player-ten an khel chhe hran lo.
Mahse, Uttar Pradesh atanga an lak luh Yougank Baliyan chuan a kutah hliam a neih avangin nikuma Chhinga Veng Spikers tan a khelh lai angin a inlan pha lo hle a, point nga hmuin point nga tho a hloh. Sihphirin state dang atanga an lak luh Niyas angin awmzia a nei tham lo va, anni pahnih hi team pahnih inkara danglamna siamtu langsar a ni.
Set khatna hneh takin Sihphirin an thunun nghal a, Niyas, Thangmin leh Mapuiaten point 14 thawk chhuakin point 10-a inthlau chungin an tlang. Set hnihnaah Anastasia-in hma an sawn naa, inthlau lovin a umtu zawkah an tang tluan tho a, Densanga’n a vuak tlak rualin 21-20-in an hnaih hman.
A hnuah Niyas chuan hui tlain Mapuia’n a vaw tla zui bawk a, set la zawn thei turin 24-21-in Sihphir an sang a; Mapuia leh Thangmin chuan hlap sual zawnin 24-23-in derthawng leh hman mah se Densanga’n a service dik loh avangin Anastasia hun tha a liam.
Pro Volleyball hmasa ber 2016 champion Electric Veng club-in set thumnaah Yougank thlakin Dinsanga an luhtir a, Mizo hlangin Sihphir an bei let. Densanga’n team fuih phurin hma an hruai char char a, Sihphirin 17-16-a an hnaih hnuah Dinsanga’n tum li a vaw tla a, derthawng zui lovin set an la a, inkhel boruak a nung thar bawk.
Set linaah an inhnehtawk hle a, 21-21 a nih laiin Niyas chuan a hnung atangin a vaw tla a, nih rual lehna hun tha Anastasia-in an hloh a, Densanga’n line pawnah a hlap chhuak. Sihphir tan set linaah PC Lalnuntluanga a langsar a, a vuak tlak hnuah lehlam tan Ruatsanga’n line pawnah a vaw chhuak.
24-21 a nih laiin Nuntluanga’n nam a tla a, Sihphirin boruak thar hipin rahbi thar an tuk. Pro Volleyball an khelh hmasak berah chak nghalin inrintawkna sang zawk nen zirtawpni zanah an khel leh nghal dawn a, Hunthar laka chak tawh Khawbel nen an intawng dawn ang.
Insiam rem nan hun an mamawh rei deuh avangin Anastasia-in an tuar a, set thumna atangin tha pangngai takin khel mah se an mar tluan chhuak zo lo va, kar leh thawhtanniah fiahna hautak zawk hmachhawnin Tuichangral nen an inhmachhawn dawn a ni.
STATS
SIHPHIR
Niyas Abdul Salam : point hmuh 23, point hloh 10
Lalhmunmawia : point hmuh 10, point hloh 5
Thangminlal Guite : point hmuh 9, point hloh 4
Albert Zothankhuma : point hmuh 8, point hloh 3
H Lalrinmawia : point hmuh 5, point hloh 5
H Lalruatsanga (setter) : point hmuh 5, point hloh 4
ANASTASIA
Laldensanga : point hmuh 12, point hloh 6
Lalruatsanga : point hmuh 10, point hloh 5
Rochanpuia : point hmuh 7, point hloh 2
Laldinsanga : point hmuh 7, point hloh 2
Helly Vanlalliana : point hmuh 7, point hloh 5
Yougank Baliyan : point hmuh 5, point hloh 5
Lalthlamuana (setter) : point hmuh 1, point hloh 0
POINT TABLE
KHAWBEL : Play 1, Won 1, Loss 0, Point 3
TUICHANGRAL : Play 1, Won 1, Loss 0, Point 3
SIHPHIR : Play 1, Won 1, Loss 0, Point 3
ANASTASIA ELECTRIC VENG : Play 1, Won 0, Loss 1, Point 0
THUTAK NUNPUITU TEAM : Play 1, Won 0, Loss 1, Point 0
HUNTHAR : Play 1, Won 0, Loss 1, Point 0
FIXTURE
MAY 2, 2025 (ZIRTAWPNI) – 8:00 PM
Khawbel v Sihphir (Mipa)
MAY 3, 2025 (INRINNI) – 8:00 PM
Hunthar v Thutak Nunpuitu Team (mipa)
MAY 5, 2025 (THAWHTANNI) – 8:00 PM
Anastasia Electric Veng v Tuichangral (mipa)
