Damdawi zinga kan chawi lar ber pawl Antibiotics hi a hman dan kan la thiam tawk lovin, a tangkaina ang pawh a kan hmang lo leh a chakna bo thak khawp a kan hmang fo thin hi a pawi takzet a ni.
Antibiotics chu natna hrik that theitu Damdawi kan ti thei ang. Chutiang a lo nih si chuan damdawi tangkai leh pawimawh berte zing a mi kan ti lo thei lovang, to lah an to hlawm reng a. He damdawi tangkai leh man to si hi Mizo chang ni lo, hnam dangte pawhin an hmang sual fo a ni. Awmna satliah, hritlang hrawkna, zun-in leh khawsik satliah ten kan ei thla zen hi chu a dik lo tawp mai. (Doctor ten mi chawh miau chuan engtin nge ni ang, kan ram Doctor te hian an lek lam hle si a).
Ram changkangah chuan natna a chhan leh vang hriat leh hmuhchhuah anih hma chuan Antibiotics an pe ve mai mai ngai lo. Na chhawkna satliah (paracetamol) an pe phawt a, investigation tul apiang an ti a, chutah natna chiang tak an hmuh hnuah Antibiotics chu duh an chawhe chuah thin a ni. Antibiotics hi duh ang hun apiang leh duh chen chen ei mai chi a ni lo. Doctor ten ni khat a ei hun an tih leh ei tur zat an tih chu ei ngei ngei tur a ni. Entirnan- Ni khata vawi 3 ei chi te, vawi 4 ei chi te ni 7 chhunga ei tur kha ni 3 emaw chauh ei chuan damdawi khan a hnathawh tur ang a thawk thin lo.
Antibiotics mahni thu a ei mai mai hian tangkaina a nei lovin, awmzia a nei lo ang bawk hian mihring taksaah hnathawh a har tial tial bawk thin. I taksa in a mamawh kha a sang tial tial bawk ang. Tin, eng Antibiotics nge ? eng natna nge a thah bik tih kan hriat loh chuan ei vak vak hian awmzia a nei chuang lo, chumi awmzia chu natna a zirin ei tur bik a awm a nih chu. Tunah chuan thiamna a lo sang tial tial a, zun leh khak te pawh an “Culture” a, ti chuan I zun kawng leh hrawkna awm tirtu bik chauhvin a ngei antibiotics kha ei chuan dam theih mai a ni. Kan theih hram chuan damdawi dang reng reng pawh antibiotics tiamin Doctorte thu lo chuan ei mai mai loh tur a ni. Sum tak tak sen a dampui tak tak si lovin leh a chang phei chuan kan taksa in a tawrh phah thin hi a lo bo theih nan fimkhur I la, tichuan hriselna lamah hma kan sawn phah ngei ang.
