Assam Rifle ram chhuahsan hman zui dan tur ngaihtuahtu Advisory Committee te chu vawiin khan an Chairman Lalduhoma, Chief Minister hovin an thukhawm.
Chairman chuan, sawrkarin a duh dana thutlukna a lo siam mai chu thaa a hriat loh avangin pawl hrang hrang aiawh telna Advisory Committee a din a. A tel tur awm ang hi chu an tel kim thawkhatin kan hria, tiin thuhma a sawi a. Member kal te chungah lawmthu a sawi a ni.
Meetingah hian Mizoram Synod atanga lehkha hmuh te, AR ram chhunga mimal ram nei court thubuaia lut mek (pending case) chungchang te, AMC, GPC Mizoram State Assembly, Health, P&E leh PHE Department atanga dilna lo lutte an pharh a.
Aizawl Civil Hospital Complex tihzauh nana Aizawl Police Station awmna hi hman a nih theih nan AR ram chhuahsanah hian Aizawl Police Station hi dah ni se tia Health Department dilna chu a thuphunga pawm (in principle) a ni a, zirchianna neih zui tur a ni.
PHE lamin tui dahkhawlna, hmun pathuma siam an dilna pawh, an siam dan tur design te hriatsak hmasak ni se an ti bawk.
Committee hian chhuahlam pangah hian kawngpui sial thain a hria a. PWD lamin an lo enfiah ang a, mimal leh pawl hmunhma a khawih theihte zirchian a ni bawk ang.
Lalmalsawma Pachuau, Secretary, UD & PA chuan Master Plan an ruahman chhin a sawifiah a. Culture & Nature Centre, khawvel khawpui changkang danga an lo neih thin ang ngaihtuah ran chunga an duan a nih thu a tarlang. A ram zawng zawng zatve aia tam (52.57%) chu hmun hring, mipuite tana len khaw thawn theihna turin an ruahman a, Advisory Committee hian an sawi ho va, a tul anga la sawi zui zel a ni ang.
