Aizawl the 5th Aug 2022: Nimin tlai dar 5.00 khan Union Home Secretary Pu Ajay Kumar Bhalla Office Chamber, New Delhi-ah Speaker Pu Lalrinliana Sailo hoin Aizawl khawpui laili atanga Assam Rifles te sawn chhuah dan tur leh thil pawimawh dang sawiho a ni.
He meeting ah hian Mizoram aiawhin Pu Lalrinliana Sailo, Speaker, Pu K.Vanlalvena, Rajya Sabha MP, Pu Rosangzuala OSD to Chief Minister, Pu H.Lalengmawia, Home Commissioner, Goverment of Mizoram te an tel a ni.
Meeting-ah hian Assam Rifles te insawn chhuahna tur order chhuah a nih tawh hnuah tun thlenga an la chhuah loh thu leh a taka an chhuah a tul tawh thu te Mizoram team te hian an sawi a. Parliament Monsoon session zawh hnuah order thar chhhuah a nih tur thu Union Home Secretary chuan a sawi a ni.
Mizoramin SRE(Security Related Expenditure) kan dawn ve ngai loh thu leh Ram ralmuang nih man awm lo taka sawrkar laipuiin SRE state thenkhata a pek lai a Mizoram in kan dawng ngai lo chu thil dik a nih loh thu Mizoram team te hian an thlen nghal a.Union Home Secretary chuan lo enzui nghal a tum thu a sawi bawk a ni.
He hunah hian Myanmar Refugee te an la pun belh zel thu te leh an hamthatna tura sawrkar laipui a inhawn zau deuh a tul thu an thlen tel bawk.
Assam Rifles sawnchhuah chungchang hi Dy Chief Minister Pu Tawnluia chuan kumin May thla khan Union Home Secretary hi a chamberah a lo sawi pui tawh a. Chumi bawhzuinain Chief Minister Pu Zoramthanga Chamberah Assam Rifles hotu te nen sawihona neih a lo ni tawh bawk a ni.
