ASEP General Headquarters, Aizawl chuan vawiin dt. 15.01.2024 (Monday) hian EF&CC Minister thar Pu Lalthansanga chu a pisa-ah hmu-in lawmpuina an hlan a. He hunah hian ASEP hruaitute an kal a ni. Lawmpuina hlan pah hian ASEP President Pu K. Lalmuansanga ziah “Environment humhalhna kawnga Mizoram chhunga Political Party hrang hrangte hnena ngenna” tih chu Minister hian a tlangzarh nghal bawk.
Minister Pu Chatea chuan Mizoramah ramngaw leh nungcha humhalhna kawnga theihtawp chhuahtu pawl ASEP a lo awm chu lawmawm a tih thu a sawi a. Kan ram environment siamṭhatna kawnga theihtawp chhuah ho zel a duh thute leh ṭhahnemngai taka ke pen zel turin ASEP chu duhsakna a lo hlan a ni.
Titi hona hun an hmannaah ASEP chuan Minister hnenah hian a bulṭanna atan thil pathum rawtna leh ngenna an siam a, chungte chu:-
(1) Riverine Reserve Forest (RRF) ṭhiahna chu sut leh a nih theih nan sawrkar hian chak taka hma la turin.
(2) Sawrkar hnathawkte tan sapel leh sava kahte hi dan kalh a nih angin hriattirna thar chhuah turin.
(3) Air gun/rifle khuahkhirhna (restriction) chungchangah chak zawka hmalakna kalpui turin.
Minister chuan theihtawpa lo enzui a tum thu a sawi.
Lawmawm ṭhin hle mai