Dated Aizawl the 5th June 2023 (Monday): ASEP General Headquarters, Aizawl leh EF&CC ṭangkawp chuan World Environment Day 5th June 2023 chu Maite khuaah Awareness Campaign leh thing phun hnatlang neiin an hmang. Maite-ah hian ASEP member eng emaw zat Aizawl aṭangin an thawk chhuak a, Maitea zirna in awm zawng zawngte YMA hall-ah kalkhawmin awareness campaign hun hman a ni a, campaign zawh hian thing phun hnatlang neih nghal a ni. He hunah hian Maite khawtlang hruaitute an tel bawk.
Awareness campaign-ah hian ASEP Presidenr K. Lalmuansanga chuan kumin World Environment Day thupui “Beat Plastic Pollution” tih hmangin zirlaite hnenah fuihna thu a sawi a. Kan ram leh hnam tan plastic leh sarang hmanruate kan do a ṭul ta a, ramngaw leh nungcha humhalh leh thing phun zel hi kan zavaia mawhphurhna a ni a, he World Environment Day kan hman mekah hian ngaihtuahna thar kan hman a ṭul a ni tih thu a sawi.
Thing phun turte hi Maitea ASEP member PC Lalrinzualan ama ṭhahnemngaihnaa a siam nursery ami hman a ni a, ani hi ramngaw leh nungcha humhalhna kawnga ṭhahnemngai tak a ni a, ASEP pawhin chawimawina hial a lo hlan tawh a ni.
