K.Lalrinliana, FCS&CA Minister leh Kolasib Assembly Constituency bialtu MLA ni bawk chuan, Assam lam ina Zophaia chawlhbuk sa a hmalakna an kalpui chungchangah vawiin khan Panchayat Bhavan, Bairabi North-ah Bairabi Joint VC chairman kaihhruaina hnuai ah tlawmngai pawl hrang hrangte nen thutkhawmna a neihpui.
Minister chuan ramri buaina avanga mizo thalaiten Assam Police kut an tawrh a rem tih loh thu sawiin, state pahnih inrina hmun ahte chuan hmalakna kalpui lo tur a inremsiam a nih angin Zophaia Assam lam hmalakna chungchangah rang takin State pahnih te Chief Minister leh Home Minister-te an inbiak nghal thu a sawi a. Thutkhawmna neih lai mek hian Assam lam chuan an chawlhbuk sak chu an rawn thiat nghal a ni. K.Lalrinliana chuan Zophaia Mizoram Police Duty-na hmun chu awmhmun rem tak a nih loh avangin chan chhe zawk chang thei kan nih thu a sawi a, hemi avang hian fimkhur tak a ngaihtuahna sen a tul thin thu a sawi. Ram chin hauh a Bairabi khawtlangin theihtawp an chhuah thinna ah leh sawrkar ngenna ngai pawimawh a ramri chungchanga thawhhona tha tak a awm thin avangin lawmthu a sawi a. Ramria buaina chinfel a nih theih nan Border Committee kaltlangin hmalak mek zel a nih thu a sawi bawk.
John LT Sanga, Deputy Commissioner pawhin thu sawiin, Status Quo kenkawh zel a nih theih nan DC leh SP an inbiak reng thu a sawi a, Zophaia chawlhbuk sak a ni tih hriat a nih veleh DC, Hailakandi hnenah hna chawlhsan tur a lehkha thawn a nih bawk thu a sawi. SP, Kolasib leh DFO, Kolasib atangte pawhin ramria hmalak dan tur ngaihthlak a ni.
Thutkhawmnaah hian ramri chungchanga thu thehdarh fimkhur a tul thu leh thuneitute hnen a thlen phawt a pawimawh thu sawi a ni a. Pawl hrang hrang kal fawr bik awm lova inlungrual tak a sawrkar thu ngaichang chung a thawhho a pawimawh thute, Police duty dah belh a tul thu te sawi a ni.
Assam sawrkar chet dan chungchangah hian :
MZP chuan, “October ni 2, 2022-a Assam sawrkarin Bairabi Zophaia Status Quo huam chhungah In pahnih a rawn sa hi a hrethiam lo hle a, engti kawng zawng maha pawm theihah kan ngai lo,” an ti.
ZPM Thalai General Secretary i/c Boundary Lalmuanpuia Punte chuan, “Hetianga buk sa ngam tura dinhmun ngampaa an awm hi Mizoram sawrkar inthlahdah vang a ni. Hetianga Mizoram sawrkar an inthlahdah hi a pawi kan ti takzet a ni. MZP General Headquarters leh Bairabi khawtlang mipuite an fakawm kan ti takzet a, ram leh hnam humhalhna kawnga an hnathawh hi kan fak a, hun tiam pein chumi hun chhunga an thiah loh chuan kan thiat ang an ti a, anni hmlakna avangin thiah a nita hi a lawmawm takzet a ni,” a ti.
PC Party chuan, “Assam miten Mizoram sawrkar leh Mizo mipuite mitmei veng lo leh pawisa miah loa Mizoram chhung Bairabi daia in an rawn sa leh ngawt mai kha PC Party chuan kan duh lo tak zet a. MNF sawrkar hnuaia Assam an rawn huangtau leh thin hi pawi kan ti hle a ni,” an ti.
